Ar sien la buh mawnongrim iaka Wapung C&RD Block

Syllad | The Rising MeghalayaDecember 17, 2021

U Myntri Rangbah ka sorkar Jylla u Conrad K Sangma haka sngi Palei ula wan ban buh ïa u maw nongrimïaka Wapung C&RD Block kaba la kynriah na Khliehriat sha Wapung.

Kane kan dei ka sien ba ar bala buh maw nongrim ia kane ka C&RD Block Wapung, kaba nyngkong ka dei ha u snem 2017 haka 22 tarik u Iaiong da u Ma Sniawbhalanglang Dhar.

Ha kane ka jingwan buh maw nongrim la don lang u myntri ka tnad C&RD Block ka sorkar Jylla u Bah Hamletson Dohling, u Myntri ka tnad Revenue ka sorkar Jylla u Ma Kyrmen Shylla uba long ruh u MLA ka thaiñ, ki MDC ka JHADC, ki nongshong shnong bad kiwei kiwei.

U Bah Hamletson Dohling haka jingkren ula ïathuh ba ïaka ophis treikam jong ka Wapung C&RD Block yn tei haka jinglut kaba 3 Klur tyngka. Ula ïathuh ba ki don haduh 105 tylli ki shnong kiba hap hapoh kane ka block.

Ula ong ba ka sorkar haba ka bishar ïaka jingkwah jong u paidbah, ka sngewdei ban pynkynriah biang ïa kane ka ophis sha Wapung.

Ula kyntu ïaki nongshong shnong ka thaiñ Lumshnong kumjuh ki marjan shnong ban nym don jingsngew halor kane namar na ka liang ka sorkar kan sa shong pyrkhat ban peit thuh hato sa katno tylli dang donkam ban pynkha pat ïaki block kiba thymmai na bynta ka jingdonkam jong ki paidbah ka Jylla.

Ula ïathuh ba ka sorkar mynta ka la trei shitom bha na bynta ban pynbit pynbiang ïaki jingdonkam jong baroh ki block. Ula ïathuh ba ha Jylla la don 46 tylli ki block bad sa 6 tylli ki block mynta la dep ban khot tender na ka bynta ban shna ïaki ophis treikam haka dor kaba 2 klur shiteng.

Satang ban kynjoh sha ka jingdap 50 snem ka jingïoh ïaka Jylla kaba pura hynrei isynei pat ïaka jinglong jingman jong ki ophis jong ki Block bad kiba bun ki ophis kidei Assam type hynrei ka sorkar kaba mynta hapoh ka jingïalam u Myntri rangbah ka la pynïoh 120 klur tyngka na bynta ki jingdonkam hapoh ki block, la ong u Bah Dohling.

U Conrad K Sangma haka jingkren ula ong ka sorkar haka jingïaid lynti kaba 3 snem shiteng ka la trei na bynta ka bit ka biang jong u paidbah. Ula ong ba ka sorkar kan sa shong pyrkhat kumno ban pynkha biang ïaki C&RD Block namar ba dang don hi ki jaka ba ki briew ki dang hap ban ïaid 50 haduh 60 kilometre ban poi sha ki jaka trei.

Ula ong ïa kane ka block la wanrah biang hangne dei lyngba ka jingbuddien u MLA ka thaiñ, ki MDC bad kiwei.

Kane kadei ka sien kaba nyngkong ba ki skul, ki thanat, ki ophis treikam sorkar bad kiwei ki la ïoh pisa ban shna pynbha kumjuh ban tei thymmai bad kane hi kadei ka jingtrei shitom jong ka sorkar Jylla, la ong u Myntri rangbah.

Ki ar Dorbar Shnong kila ai sngewbha ïaka jaka kaba heh 5 acre tam na bynta ban tei ïaka ophis bad jaka sah jong ki nongtrei.

Ka sorkar barim hadien ka ingpyrshah uba bun bala lang khamtam u paidbah ka Elaka Narpuh kala rah ia kane ka block sha Lumshnong bad kala pyndam iaka jingpynbna.

Ha kane ka sngi la ïoh ia jingkren lyngkot na u Bah T. Lyngwa u Secretary ka tnad C&RD, u MDC ka JHADC u Phasmon Dkhar, u Incharge DC ka East Jaintia u SS Syiemlieh bad ïaki kyntien khublei la pashat da u MDC ka thaiñ u Ma Lasky Rymbai Deputy CEM JHADC.