Ar taiew ai por ka High Court ia ka JHADC ban file affidavit bym pyntreikam iaka hukum pyllait tulop

Syllad | The Rising MeghalayaFebruary 14, 2024

Ka iingbishar High Court Meghalaya ka la ai por ar taiew ia ka Jaintia Hills Autonomous District Council (JHADC) ban file ia ka affidavit halor ka jingbym pyntreikam ia ka rai jong ka ban pyllait ia ka tulop jong ki nongtrei ka JHADC hapoh jong ka hynriew bnai, kata naduh u bnai Lber 2023.

Ia kane ka hukum la shim da ka iingbishar High Court ha ka por ba la pynlong ia ka hearing jong ka contempt petition hapdeng ka JHADC Staff Association pyrshah ia ka JHADC bad ka sorkar Meghalaya ha ka 6 tarik u Rymphang ba la dep.

Lah ban kdew ba ka JHADC Staff Association ka la file da ka contempt of court petition pyrshah ia ka JHADC bad ka sorkar Meghalaya ha ka 11 tarik u Nohprah jong ka snem ba la dep. Ia ka hearing kaba nyngkong la pynlong ha ka 19 tarik u Nohprah jong ka snem ba la dep.

Ka High Court ka Meghalaya ha u bnai Lber 2023 kala pynmih iaka hukum haka jingshim bishar ia ka jingkyrpad jong ka JHADC Staff Association pyrshah ia ka sorkar Meghalaya bad ka JHADC. Ka ïingbishar kala hukum ia ka sorkar ba ka dei ban pyllait noh ia baroh ki jingioh lum khajna ba dang sahteng sha ka JHADC hapoh ka hynriew bnai bad ha kajuh ka por ka la hukum ia ka JHADC bad kan siew dep noh ia ka tulop ba dang sah jong ki nongtrei hapoh ka hynriew bnai.

Ka jingap khmih lynti kaba jlan, kata haduh hynriew bnai da ki nongtrei ka JHADC ka la kut noh khlem kano kano ka jingseisoh ha u bnai Risaw u snem ba la dep namar na ka liang ka sorkar lane ka JHADC kim shym la pyntreikam ia ka hukum jong ka iingbishar.

Hapdeng kine ki hynriew tylli ki bnai, ki nongtrei ka JHADC ki la pynlong haduh laisien da ki jingiakhih kiba jai jai ban kyrpad ia ki bor ba dei khmih bad kin sngap lem ia ka jingkyrpad ka jong ki.

Ha kawei pat ka bynta kaba la pyllait khyndiat na ka jingeh iaki nongtrei ka JHADC, na ka liang ka Executive Committee ka la pyllait ia ka tulop jong ki haduh u bnai Jymmang u snem ba la dep.