Ar taiew ai por ka Synjuk Waheh Shnong iaka sorkar ban maramot iaka surok Sutnga Saipung bad ka NH-6.

Syllad | The Rising MeghalayaSeptember 9, 2023

Ka Synjuk Waheh Shnong (SWS), East Jaintia Hills District kala ai por ar taiew iaka sorkar ban maramot iaka surok Sutnga Saipung bad iaka NH-6 kiba la sniew shaba palat liam kaba la buh jingeh iaka iaid ka ieng u paidbah.

Ia kane ka rai ka synjuk kala shim haka jingialang kaba long haka sngi Palei, ha Khliehtriat.

U kyrwoh bala phah da u president ka SWS, East Jaintia Hills, u Ma Hambertus Nongtdu, ula ong b aka National Highway-6 naduh Soomer, West Jaintia Hills haduh Malidor, East Jaintia Hills u la jot. Kiba bun ki bynta jong kane ka surok kala sniew bad lang um kaba dap da ki thliew ki syad kiba la pynthut pynjynjar shikatdei eh ia ka leit ka wan jong u paidbah.

“Ka Surok NH-6, u dei u budlum bad pyniasoh ia bun tylli ki jylla bad ka Meghalaya, kynthup iaka Assam, Tripura, Mizoram shibynta ka Manipur. Hynrei ban iaid ban ieng ha kane ka surok kalong kaba ma bad khlieh la ka sngi ka don ka jingdheng kali naka jingsniew ki kali kaba la buh jingeh iaka iaid ka ieng u paidbah khamtam kiba pang shitom, ” ong Ma Hambertus Nongtdu.

U ma Hambertus ula ong ba ka sorkar Meghalaya ka tip bha ia jinglong jingman ka surok NH-6  bad ka surok Sutnga-Saipung, hynrei kaba phylla kala leh bym patiaw ban pynjem iaka jingeh u paidbah khamtam East Jaintia Hills District.

Ula ong ruh ba haka 2 tarik Nailar, U Chief Minister ruh u la kular ha khmat ka synjuk ban shna ia kine ki surok, hynrei kala kut tang haka jingkular mynta la shibnai kam pat don kino kino ki dak ki shin.

Ka synjuk ka ieng haka nongrim bad kren shai ba kan ai por hapoh ar taiew ban maramot noh ia  kine ki surok baroh ar tylli, bad lada ka sorkar ka dang leh kuman ka synjuk kan shim da kiwei ki sienjam kiba tyngeh ban pynpei skhor iaka sorkar jylla.