Ar tylli ki hattrick khyrwit u Da-u-ruhi, jop kput ka Sailung iaka Nangbah Iawmusiang

Syllad | The Rising MeghalayaNovember 11, 2022

U Da-u-ruhi Pale ula khyrwit ar tylli ki hattrick ha ka juh ka jingialehkai kaba la pynlong iaka Sailung Ialong ban jop kput haduh 9-0 pyrshah iaka Nangbah Iawmusiang haka jingiakhun semifinal ba nyngkong haka 1st Division Football Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka sngi Thohdieng.

Ia kine ki 9 kol, u Da-u-ruhi Pale marwei ula khyrwit 6 kol ne ar tylli hattrick ha ka juh ka jingialehkai. Ia kine ki kol u Da-u-ruhi ula thep haka minit kaba 45, 47, 55, 63, 75 & 85. U Batskhem Dhar ula thep ar kol (19, 21) bad shikol la thep da u Jefkeemanson Rymbai (89).

Ka Nangbah Iawmusiang ha kane ka jingiakhun kam shym la khie khlieh bad ka hap ban hun ban pdiang ia kane ka namrem kaba bun kol.

Da kane ka namjop ka Sailung Ialong kala buh jaka ialade haka final bad kan aireng pyrshah iaka kynhun kaba jop lashai ka sngi hapdeng ka Moosyiem Shangpung pyrshah iaka Mukhla Raij haka por 1:30PM