Arngut kiba shah pyniap ha Umpleng ki dei na Nepal, uwei na EJH, ym pat lapksai ki pulit

Syllad | The Rising MeghalayaJuly 7, 2024

Napdeng ki sawngut ki briew kiba la shah pyniap dusmon ha ka shnong Umpleng, East Jaintia Hills, mynta la lah ban ithuh ia laingut na ki ha kaba arngut ki dei na Nepal katba uwei pat u dei trai shnong napoh ka district.

Kine ki laingut kiba la shah pyniap ki dei kiba la tip kyrteng kum u Ravi Rai 23, uba dei na ka shnong Elam ha Mechipradesh, Nepal u Rajesh Rai 26 na ka shnong Dharan Sunsari kaba ha Koshi Anchal, Nepal bad uwei pat u Nazar Kyndait 33 snem rta uba dei na ka shnong Dkhiah East Pohshnong, East Jaintia Hills.

Ia ki metiap jong kine ki laingut ki lanot la aiti noh sha kiba haiing hasem hadien ba la pyndep ia ka post mortem.

Lah ban kdew ba ia ki metiap jong kine ki sawngut ki briew kiba la shah pyniap dusmon da kaba sheh teh lang hajuh ia ki kti ki kjat bad shah mait da ki kynja wait na khlieh bad ryndang la lapdien ha ka 6 tarik Naitung ha lyndet jong ka iew Umpleng, East Jaintia Hills

Hadien kane ka jingjia naka liang ki heh pulit ha ryngkat ka kynhun CSU, Mobile forensic Crime scene unit bad u Megistrate ki la wan poi mar mar sha kane ka jaka ban bishar bniah ia ka jinglong jingman bad ban lum ia ki sakhi satar.

Na kaliang ki Pulit kila ong namar ka jingshah pyniap jong kine ki sawngut kala long kaba i shyrkhei, kumta ruh na ka liang ka tnad pulit ka la thaw ia ka kynhun tohkit ba kyrpang (Special Investigation Team (SIT) ban iarap lem ha kaba pynlong ia ka jingtohkit halor kane ka jingjia.

Haduh mynta, ki Pulit kim pat shym la lapksai ne ioh kem iano iano ruh halor kane ka jingjia shah pyniap ba shyrkhei.