Audit COVID-19: Pynmih ka sorkar da ka jingbthah halor ka koit ka khiah

Syllad | The Rising MeghalayaMay 31, 2021

Ka tnad koit ka khiah jong ka sorkar jylla lyngba ka shithi No.Health.21/ 2020/ Pt. VIII/ 95 dated 27^th May, 2021, haka jingialang ban lum jingkhein ne audit ia kiba iap na ka jingpang khlam COVID-19 bad hadien ka jingiatai ba sani bha bad ka State Medical Experts Committee, la shem bad lap ia ki daw kiba kongsan.

Ka Sorkar hadien kane ka audit iaka jingiap na ka jingpang khlam COVID-19 kala pynmih da ka jingbthah halor ka koit ka khiah.

Kine harum ki dei ki mat kiba la kdew bad kiba donkam ba paidbah baroh ban tip:-  

Na ki 340 ngut kiba iap kiba la ioh jingkhein ha ka jylla haduh katei ka sngi, 60 ngut ki dei kiba la khlad lypa shwa ban poi hospital. Kane ka long namar kito kiba don ki dak jingshitom ki jied ban shong beit ha iing bad ki pynslem ban wad ia ki lad jingsumar. Ka jingpoi slem sha hospital tad ynda la hiar ka oxygen saturation ha ka met ka buh ia ka jingma namar bun ki nongpang ki jur ka jingshitom ha kum kine ki por. 

Lyngba kine ki jingshem, la kyntu ia ki paidbah ba dei ban sngewthuh bha halor ki mat kiba harum khnang ban lait na ka jingshitom jur, bad ban lait na ki jingjia ba sngewsih:- 

• Lada pang shit, set ryndang, ktha met, pynhiar, jah ka bor jingsma bad duna ka bor jingmad lane jyrhoh, dei ban pyntip kloi sha ki doctor khnang ban sdang ia ka jingsumar lyngba ki dawai ha iing bad ruh bad test noh mar mar na ka bynta u Covid-19.

• Ki paidbah khamtam ki nongpang ki donkam ban tip bad shemphang ia ki dak jingma jong ka jingpang khamtam ha ka sngi ba phra eiei, ba khein naduh ka sngi nyngkong ba lap ia ki dak ki shin (symptoms). Ka long kaba donkam ba baroh ngi dei ban don jingtip ban sngewthuh bad khein ia ka sngi ba nyngkong ha kaba paw ki dak ki shin ha ka met.

• Ki dak jingma ha ka sngi ba phra eiei ki lah ban long naduh:
  (a) Ka jingthait ne jingtlot kaba kynsan bad kaba nang jur.
  (b) Ka jingnang jur ne jingwan biang ki dak jingshitom.
  (k) Ki dak jingshitom ba dang paw thymmai.
  (d) Ka jingjur ne khie biang ia ka pang shit.
  (e) Ka jyrhoh kaba jur.
  (g) Ka jingpang shadem.
  (ng) Shitom ban ring mynsiem-kaba jur ne ka bym pat ju don mynshwa.

Lada lap ba long kumne, ki nongpang ki dei ban iakynduh ne phone mar mar ia ki doktor jong ki lane ki Medical Officer namar kine ki lah ban dei na ka jingshitom palat ne tyrha palat na u khniang jingpang. Mar mar dei ban ai ia ki lad jingsumar khlem pynslem ha kum kine ki khep. Ki paidbah ki lah ruh ban phone ban pyntip sha ki War Room Helpline ia kiba ki phone number la pynbna paidbah.

• Ki nongpang bad ki nongsumar ki donkam ban long adkar bad phikir ia ka jingpaw ki dak jingshitom bad wad mar mar ia ki lad jingsumar. Ka jingsumar bad ka jingdih ia ki dawai ha ka por ba biang kan pynduna ia ka jingdonkam ban thiah hospital bad ai oxygen/thiah ICU. Kaba kham kongsan, la khmih lynti ba kane kan teh lakam ia ka jingkiew ka jingdon jong kiba iap.

Ban pynthikna ba ngim dei ban iaid lait ia kitei haneng bad kum shibynta jong ki lad jingiada na u COVID, ki nongtrei ka Koit Ka Khiah, ki magistrate bad kumjuh ki volunteers jong ki shnong kin leit sha man ki iing ban ai jingtip bad jinghikai halor ki mat ba la kdew haneng bad ruh ban kylli thuh ioh don kino kino kiba don ki dak jingpang.

• Kin kylli bha halor kino kino ki longing kiba don ki tymmen, lane ki briew ba don jingshitom ha ka met, namar kine ki dei ki ‘High Risk’ group, lane kiba kham tlot ha ka bor met bad kiba lah ban shah ktah kham jur ha u virus.

• Kin ai jinghikai ia ki nongpang ba kin peit ia ki dak jingma bad ka jingdonkam ban wad ki lad jingsumar haba ki dak jingshitom ki nang jur. 

• Dei ban sngewthuh ba watla kiba bun kiba pang ki donkam tang ki lad jingsumar kiba malu mala ha ki sngi kiba nyngkong jong ka jingpang, kitei ki dak jingshitom kiba jur kiba la kdew haneng ha ki katto katne ki lah ban paw ha ka sngi  kaba 8 eiei naduh ba sdang paw ki dak jingshitom. Kane ka long ka por kaba buh jingma bha ia ki nongpang. Na kata ka daw, ym dei ban khein sting ia kino kino ki jait jingpang da kaba ong ba dei tang ka baiongkhlieh ba ju ioh man ka por.

Kine ki jingshem bad jingkyntu ki dei ban long shibynta jong ki lad jingbthah ban lap biang por ia ki dak jingshitom bad ioh ki lad jingsumar.