Ba artatein iaka jingpynbeit pud; ai dorkhas ka HBDRF ha u MP Shillong ban pynrung biang iaki jaka ha Block-I sha Meghalaya

Syllad | The Rising MeghalayaAugust 19, 2024

Ka Hynñiewtrep Border Dispute Redressal Forum (HBDRF) haka 17 tarik Nailar kala ïa kynduh ïa u MP ka Shillong u Dr. Ricky AJ Syngkon ha Saint Clareth Parish Hall Phramer, West Jaiñtia Hills District ban pynsngew bad ai jingthoh halor ki jingeh ki paid nongshong shnong kiba shong basah haki jaka khappud bad ka jingïapynbeit pud hapdeng ka jylla Meghalaya bad Assam.

Haka dorkhas ka Forum kala ïathuh shaphang ka jinglong trai man trai jong ki Khasi Pnar ne ki Labang Nangphyllut halor ka khyndew ka shyiap u pud u sam naki khana pateng bad ki jingthoh jingtar kiba lah ban pynshisha.

Ka Forum ka pynpaw ruh ïaka jingsngewsih halor ka jingleh donbor jong ka sorkar Assam haka por ba thaw ïaki District Councils naka bynta ki jaid bynriew riewlum ka jylla Assam haka snem 1949-50 AD da kaba khlad bad pynïasoh jubor ïaka Elaka Labang Nangphyllut & Pangam Raliang (Block -1) sha United Cachar & Mikir Hills haka jaka ban don bad ka United Khasi Jaiñtia Hills District Councils kumba juh long naduh hyndai hynthai kulong kumah.

La ïathuh ruh ïaki jingshah lehbeiñ shah thombor ki paid Khasi Pnar jong kane ka thaiñ naduh baki la shah pynhap jubor sha Karbi Anglong Assam (Mynta ka West Karbi Anglong). La kdew ruh iaki Notification ne ki shithi sorkar kaba ka Assam ka pynpaw ïaka jingkubur baka la leh bakla halor ka ba pynhap jubor ïakane ka Elaka shapoh United Cachar Mikir Hills bad ïaki shithi baka la phah sha ki District Councils, ka United Khasi & Jaiñtia Hills bad ka United Cachar Mikir Hills ba kin shimkhia ban pynbeit ne pyndep ïaka kam ban re-transfer biang ïaka ne ka jaka sha United Khasi Jaiñtia Hills District.

Ka Forum ka pynpaw ruh ïaka jingartatien baka jingïa pynbeit pud hapdeng ka Assam bad Meghalaya kan pynïoh ïaka hok jong ki, kata ban pynphai biang iakane ka jaka sha Meghalaya. Kumta ka Forum ka kyntu bad kyrpad ruh ïa u MP ba un sngewbha ban shim khia’ bha ïakane ka kam bad ban kren hapoh Parliament bad ruh bad ki heh ki haiñ ka sorkar pdeng naka bynta ban ai ka jingbthah iakine ki ar sorkar ban ym don kano kano ka jingleh shiliang lane ka jingleh arsap haka ba pynbeit ïa u pud u sam.