Ba banbor ka KSU: Kular ka MPSC ban pyllait paidbah ia ki marks kiba iakhun eksam MCS hapoh 24 kynta

Syllad | The Rising MeghalayaAugust 9, 2024

Ka Meghalaya Public Service Commission (MPSC) ka la kular ban pyllait paidbah ia ki marks jong baroh kiba iakhun ia ka eksam Meghalaya Civil Service (Preliminary) hapoh ka 24 kynta hadien ka jingiakhih jong ka Khasi Students’ Union (KSU) ban dawa na ka bynta ka jingthungkam kaba kaba khuid bad shai.

Kane ka jingkular ka la mih na u Chairman ka MPSC ha ka jingialang bad ki nongialam jong ka KSU haka janmiet 8 tarik Nailar.

Ka jingiakren kaba la mih na kane ka jingialang ba la ia soi da baroh ar kynhun ka la ong ba ka MPSC ka la mynjur ban pyllait paidbah ia ki marks jong baroh ki nongiakhun ia ka eksam MCS (Prelims) hapoh ka 24 kynta.

Ka Commission ka la pynthikna ruh ban pynmih ia ka answer key kaba kynthup ia ki answer key kiba bakla bad kiba la pynbeit lem bad ki laitylli ki jingkylli kiba bakla ha ryngkat ki jubab kiba dei hapoh ka 24 kynta.

Ha kane ka jingialang ka KSU ka la dawa ruh ba ia ka personal interview na ka bynta ka kam Meghalaya Police Service ruh dei ban leh katkum ka jingpynbna laitkam ba la pynmih nyngkong ha u snem 2019 ha kaba ka ratio ka dei ban long 1:2.5 bad ym kum ka Office Memorandum bathymmai kaba la pynkylla sha ka 1:1:5.

La ong ba na ka liang u Chairman ula pan por halor kane ka bynta  khnang ba un ioh ban iamir jingmut  ha ka jingialang bad kiwei pat ki dkhot ka Commission.

Nalor kane ka jingiakren lyngba katei ka jingialang ka ong, “Ia mynta ka personal interview ia kaba la buh ban pynlong ha ka 20 bad 21 tarik Nailar 2024 dei ban pynsangeh noh tad haduh ban da pynbna da kumwei pat.Ki Roll number ki dei ban long ki juh na ka Prelims haduh ka Personal Interview jong ka Meghalaya Civil Service Examination.Ia ka jingpynbna kaba 6 tarik Nailar 2024 dei ban pynkut noh bad ia ki marks dei ban buh ha ki rynsan paidbah.