Ba bun ki riew shim kabu ha ki kam pathai khubor, rai ka MEPA ban thoh sha ka DIPR

Syllad | The Rising MeghalayaOctober 5, 2023

Ka jingialang jong ka Meghalaya Editors’ and Publishers’ Association (MEPA) kaba dei ka kynhun ba ha khlieh duh jong ki lad pathai khubor ha Meghalaya kaba la long haka sngi Palei ha Shillong ka la iakren halor ka jingioh pdiang ia ki jingujor na ki nongpathai khubor ha ki District bapher bapher jong ka jylla ia ka jingdon jong ki YouTuber shimet (private YouTubers) kiba leit lum khubor kylleng kylleng, kiba leit ha ki jingialang bapher bapher jong ka sorkar, bad ruh kiba leit ban don ha ki Press Conference, Press Briefing ha ki District bapher bapher.

Nalor kata la iakren ruh halor ki jingujor ba ki don ki YouTuber kiba tah ia ki jingthoh ‘Press’ ha ki kali jong ki.

Ka MEPA ha kane ka  jingialang ka la rai ban pynshai sha baroh ki paidbah ba ki lad pathai khubor ba la aibor ban trei ki dei kiba la register ha ka ophis u Registrar of Newspapers of India (RNI) bad ruh kiba la ithuh (Empanelled) da ka Directorate of Information and Public Relations (DIPR) jong ka Sorkar Meghalaya. Nalor kata, ki nongpathai khubor ne nonglum khubor ki hap ban don ia ka Identity Card ba la ai da ka kotkhubor, TV channel lane Digital Channel ba ki trei lane ka Accreditation Card ba la ai da ka DIPR.  

Kumta, khnang ban lait na kino kino ki jingshim kabu na ki riew shimet bad ban kiar na ki jingkulmar jingmut, ka MEPA ka la rai ban  thoh sha ka DIPR halor kane ka kam khnang ba ki paidbah kin ym shah ialam bakla ha ki briew kiba kam ne leh ialade kum ki nonglum khubor lane nongpathai khubor. 

Ha kajuh ka por, na ka liang ka MEPA ha u kyrwoh lyngba u Bah John Thabah, General Secretary ka la rai ban ia don bynta lang bad ki kynhun jong ki lad pathai khubor bapher bapher ha Ri India ban thoh sha u Chief Justice of India bad kyntu ia u ban tuklar lem halor ki jingpyrshang ban khniot ia ka hok jong ki nongthoh khubor (Press Freedom) kumba ka la jia ha ki khyndiat sngi ba la dep ia katto katne ki nongthoh khubor ha Delhi.