Ba don ka jingiakynad hadpeng ki Pnar bad Karbi, rai u CM Assam bad CM Conrad ban jurip iaka Khanduli bad West Karbi Anglong

Syllad | The Rising MeghalayaMay 25, 2023

Ki ar ngut ki Chief Minister jong ka Assam bad Meghalaya kin jurip lang iaka Khanduli ha West Jaintia Hills bad ka thain Karbi Anglong ha u bnai Jylliew ban wanrah iaka jingsngewskhem ki paidbah hadien bala mih ka jingiakynad kaba khah khah hapdeng ki jaidbynriew Pnar bad Karbi.

Ia kane kine ki ar ngut ki Myntri Rangbah u Himanta Biswa Sarma bad u Myntri Rangbah ka Jylla Conrad K Sangma kila ong haba kren bad ki nongthoh khubot hadien ka jingialang iakren pynbeit pud jong ka kylla kaba ar na ka bynta ki 6 tylli kiwei pat ki jaka ba iakhajia kiba dang sahteng kaba long ha Assam State Guest House Koinadora, Khanapara Guwahati.

Ki hynriew tylli ki jaka ba iakhajia ba dang sah ban pynbeit ki kynthup Langpih ha West Khasi Hills District; Borduar, Nongwah-Mawtamur, Deshdoomreah, Block-ll ha Ri Bhoi District; Block-l, Psiar-Khanduli ha West Jaintia Hills District.

U Myntri Rangbah ka Assam Himanta Biswa Sarma ula ong “Naduh mynta ka sngi, ki Regional Committee jong ki artylli ki Jylla kin sa sdang noh ia ki jingialang, jingleit jurip ia ki jaka ba iakajia kiba don mynta. Ha u bnai Jylliew, ha ki taiew ba kut jong u Jylliew, u Myntri Rangbah ka Meghalaya bad ma nga, ngin sa hiar jurip ia ka Karbi Anglong bad West Jaintia Hills, kaba don mynta hapdeng ka jingiakynad kum shibynta ban wanrah pat ia ka jjingsngewskhem u paidbah”.

“Baroh arliang ki paid nongshong shnong kin don ia ka jingsngew sngewkhem bad ngin ai ka jingkular na baroh ar Jylla kin sa pynbeit noh ia ki jingiapher jingmut, jingiakajia pud da ka mynsiem ban pynneh ia ka jingsngew paralok hapdeng ki paidbah na Meghalaya bad Assam,” la ong u Himanta.

Pule | Mynjur pynbeit pud ka Assam Meghalaya ha ki 6 jaka

Ula pynpaw ruh ia ka jingkyrmen ban pynbeit ia kane ka kam bad ka jingiapher jingmut lyngba ki jingiakren bad ka jingia shaniah mar kylliang.

U Myntri Rangbah ka Assam, u la ong ki Regional Committee kin sa aiti ia ki kaiphod hapoh ki taiew ba khadduh u bnai Naitung bad bud pat saka jingialang ki arngut ki Myntri Rangbah.

U Myntri Rangbah ka Jylla Meghalaya, u Conrad K Sangma u la ong ba ka jingialang ka la bthah ia ki Regional Committee ban lum ia ki jingtip bad ban sngap ia ka jingkwah ki paidbah kumba leh haka kylla kaba nyngkong bad u kyrmen ban ioh iaka kloi iaka kaiphod, katto katne ki jaka ki lah ban ioh kham kloi bad katno katne pat kan shimpor.

U la ban biang ba ki arngut ki Myntri Rangbah kin hiar jurip iaka West Jaintia Hills bad ka Karbi Anglong kaba dang don haka jingiakynad bad ban apil bad kular ia u paidbah ba baroh ar tylli ki sorkar jylla kin wanrah iaki lad ki lynti ban pynjem iaka jingeh jong ki.

U Conrad ula ong ba u don ka jing sngewskhem ha ka jingialam jong u Myntri Rangbah ka Assam bad ka Sorkar India bad kin sa wad ia ka lynti ban pynbeit noh ia kane ka kam da ka jingiashaniah markylliang bad jingialong paralok. Ula kyntu ia ka Survey of India ba kan bteng ia ka jingiaid sorjamin jong ki hynriew tylli bala dep pynbeit haka kylla kaba nyngkong bad ban pyndep ka sorjamin.

Lah ban pynkynmaw ba ki 6 tylli ki jaka bala dep iakren pynbeit bad la dep soi ruh ia ka soskular ha ka 29 tarik Lber 2022 ki kynthup ia ka Hahim, Gizang, Tarabari, Boklapara, Khanapara-Pilingkata bad Ratacherra.