Ba duh card rashon leit tur ki spah ngut ki longkmie ka thain Tyrso sha ophis u DC Ri Bhoi

Syllad | The Rising MeghalayaJanuary 13, 2025

Da ki spah ngut ki longkmie kiba dei na ki longiing baduk na ka thain Tyrso, Ri Bhoi District ha ka 13 tarik Kyllalyngkot ki la hiar sha Nongpoh ban leit pan jingshai na u Deputy Commissioner ka Ri Bhoi District halor ka jingbym ioh jong ki ia ki card rashon wat hadien ka jinglum khana samari (Census) jong u snem 2011.

Kane ka kynhun ki longkmie ba la lamkhmat da ka Kong Iohilut Lyngdoh bad kiwei kiwei ha kane ka jingleit tur paidbah ki la pan jingpynshai halor ka jingbym ioh ia ka bhah kaba iadei bad ki card rashon bad ruh ban ioh bhah ia u khaw rashon kumba ioh lem kiwei kiwei ki longiing baduk.

Ka Kong Iohilut Lyngdoh haba kren sha ki lad pathai khubor hadien ka jingiakynduh ia u DC, da ka jingsngewkhia ka la iathuh ba ka nongrim hi kalong namar ba kum ki longkmie ki la hiar dalade ban leit pan jingshai na u DC namar ba tad haduh u ne u snem kim shym la shah kynthup ban ioh bhah ne shah kynthup ban ioh ia ka card rashon ban ioh ia u khaw ration ba la mang da ka sorkar na bynta ki longiing baduk.

Ka la iathuh ruh ba kum ki longkmie kiba wan na ki longiing baduk ki dap da ka jingsngew lyngngoh ba naduh ba la dep lum ia ka khanasamari ne census jong u snem 2011, da ki spah ngut ki longkmie kim shym la ioh ia ka card rashon kumba ki dei hok, hynrei kaba kham sngewkhia ka long ba ki don pat ki longiing kiba kham bit kham biang ki ioh ia ka jingbhah ia u khaw rashon.

Haba pynshai halor katei ka jingwan mih jong ki longkmie ka thain Tyrso, u DC ka Ri Bhoi District, u Abhilash Baranwal u la iathuh, ba ki longkmie ki la wan ban buh jingkylli na u, ha kaba iadei bad ka jingbym ioh card rashon watla la dep ia ka jingpynrung kyrteng ia ki, da kaba ong, ba ka ophis jong u hi kam lah ban leh eiei halor kane namar ia kane ka bynta la leh hi da ki bor ka sorkar pdeng bad lada kam pat don kano kano ka jingpynrung kyrteng na ka liang ka ophis jong u kam donbor satia, watla katta na ka liang u DC un shimkhia ban buddien ia kane ka kam kumba la ujor da kine ki longkmie.