Ba ïaid lait ïaki kyndon Eco Sensitive Zone, dawa ka JSM na ka MoE&FCC ban pynsangeh ïaka par mawshun ka Star Cement

Syllad | The Rising MeghalayaJanuary 22, 2020

JOWAI: Ka Jaiñtia Students’ Movement (JSM) kala dawa na u Deputy Inspector General of Forests, Ministry of Environment & Forest, Climate Change (NEZ),  Government of India ban pyndam ïaka public hearing kaba khot da ka Meghalaya State Pollution Control Board (MSPCB) haka 30 tarik une u bnai naka bynta ka jingthmu pynheh par mawshun ka Star Cement ha Brishyrnot bad ka iaid lait iaka kyndon jong ka Eco Sensitive Zone (ESZ) Narpuh Wildlife Sanctuary bad ka hukum jong ka ïingbishar ba hakhliehduh ka ri.

U President bad ka General Secretary jong ka JSM u Leningstar Rymbai bad u Roitre Dkhar kila ujor sha u RL Sanga, IFS, Deputy Inspector General of Forests,Ministry of Environment & Forest, Climate Change (NEZ) ban pyrshah jur halor kane ka public hearing kaba la buh tarik ban long haka 30 Kyllalyngkot 2020 namar ba kane ka jaka ka hap hapoh ka Eco Sensitive Zone ka Narpuh Wildlife Sanctuary.

Ka JSM katkum ka shithi kaba la phah sha ka MOEF, kala ong ba katkum ka jingbynbna kaba la pynmih da ka Union Ministry of Environment, Forest & Climate Change Dated New Delhi, the 6th September, 2017 No.  S.O.2942(E) ba ka Narpuh Wildlife Sanctuary kaba don ha East Jaiñtia Hills kadei kaba kaba riewspah bha haka jingdon ki mrad ki mreng bad ki jingthung jingtep. Kane ka sanctuary kadei kawei na ki sanctuary kaba don ki mrad ki mreng kiba bunjait kaba dang lah ban lap ïa ki Huleng, ki skei, ki dngiem, ki khla, risang bad kiwei kiwei ki mrad khlaw. Nalor ka Narpuh Wildlife Sanctuary ka Narpuh Reserved Block II ruh ka dei ka jaka shong sah jong ki spah jait ki sim ki doh bad ki thabalieh bad kiwei kiwei.

Katkum kane ka jingpynbna katkum ka sub section(1) and clauses (v) and (xiv) of sub-section (2) and sub-section (3) of section 3 of the Environment (Protection) Act 1986 (29 of 1986) read with sub-rule (3) of rule 5 of the Environment (Protection) Rules, 1986, ka sorkar pdeng kala dep pynbna ba ka jaka naduh 1.20 kilo meter haduh 7.70 kilometer na u pud u sam ka Narpuh Wildlife Sanctuary ha Jylla  Meghalaya  la tip kum ka Narpuh Wildlife Sanctuary Eco-sensitive Zone bad ka heh 194.23 square kilometres.

Bad katkum kane ka jingpynbna ym shah ban shna ne wanrah ïaki kharkhana kiba pynjaboh ïaka mariang ne pynthud ïaki jingthaw ba im haka Eco sensitive Zone.

Katkum ka memorandum jong ka MOEF bad ka Climate Change kala kdew shai ba kano kano ka jingthmu ban khlong mar pohkhyndew hajan ki Eco Sensitive Zone lane 1 km ne kham heh na u pud u sam jong ki sanctuary la mana pyrshah bad ruh katkum ka hukum jong ka ïing bishar ba hakhlieh duh ka ri.

Wat ka clearance na ka bynta ban wanrah ki kam pynroi hapoh 10 Km hap ioh clearance ha kum kine ki khlaw na Standing Committee of the National Board for Wildlife (SCNBWL) bad ka jingtih mawshun kadei ka kam shimet ne ka kharkhna bad kam dei ka kam pynroi bad dei halor kane ka JSM ka pyrshah ba iaid lait ïaki aiñ ki kyndon jong ka ESZ.

Ha kaba iadei bad kane ka JSM ka kynhun kaba sngewkhia halor ka jingshah ktah ka mariang bad ki jingthung jintep bad ki mrad mreng ka Narpuh Wildlife Sanctuary ka pyrshah jur iaka jingpynheh par mawshun ka Star Cement ha Brishyrnot, East Jaintia Hills District, Meghalaya namar ba ka don hajan ka Eco Sensitive Zone ka Narpuh Wildlife Sanctuary.

Halor kane ka JSM kala dawa naka MOEF, Climate Change ban pyndam ïaka Public Hearing namar ba kadei pyrshah ïaka hokum jong ka ïing bishar ba hakhlieh duh ka ri bad ban khang shi syndon iaka Star Cement ban khlong mawshun namar ba kane ka jaka ka don ha Eco Sensitive Zone.

Kane ka jaka ba thmu ban tih mawshun ka kharkhana Star Cement ha Brishyrnot ka heh haduh 42.051 hectare bad ka jngai tang 1.46 KM na Khlaw Narpuh bad jngai  0.25 na ka Eco sensitive zone ong ka JSM.

Ka JSM ka pyrshah jur ïa kane ka jiingpynheh par mawshun kane ka kharkhana namar ka khlaw Narpuh kaba dang bun byllai ki mrad ki mreng ba kyrpang bad kan ktah ruh ïa ki um ki wah ha katei ka jaka naduh ka Wah Lukha, Lunar bad ka Umso Nallah bad ka koit ka khiah ki nongshong shnong kiba don haduh 17 shnnong namar b aka jingbthei iaki dynamite bad ka jingpyndonkam iaki kor ki bor ban tih mawshun.