Ba iaid lait u bar Jylla ia ka aiñ shna iing ka MUDA ha Lumdiengjri; ka ain kala leh ia kaba donkam: Wailadmiki

Syllad | The Rising MeghalayaNovember 12, 2024

U Chairman ka Meghalaya Urban Development Authority (MUDA) u Bah Wailadmiki Shylla ha ka 11 tarik u Naiwieng u la ong ba ka ain shna iing (Meghalaya Building Byelaws) ka treikam kumjuh ia baroh ki nongshong shnong khlem da khein la ki dei na kino kino ki kynhun jaidbynriew.

Katkum ka jingong ka jong u, ki bor ba dei khmih kin ym tyngkai ban shim ia ki lad jingpynshitom pyrshah ia kino kino kiba pynkhein ia kane ka ain na ka bynta ka jingbit jingbiang bad ka jingshngain jong ki paidbah nongshong shnong.

Kane ka jingpynpaw jong une u Chairman ka MUDA ka long ruh halor ki jingkynnoh ba dang shen da ki nongshong shnong jong ka Lumdiengjri ba ka MUDA ka la pynslem ban leh ei ei pyrshah ia ka jingtei iing beain jong uwei u bar Jylla uba kyrteng u Muhammad Suleman, kata wat hadien ba la ujor pyrshah naduh ka 25 tarik u Risaw 2023, ha kaba ka la mih ruh ka jingkylli ba hato kane ka ain ka treikam tang ia ki trai ri trai muluk.

Haba kren sha ki lad pathai khubor, u Bah Shylla u la ong, “Nga kwah ban pynshai shai kdar ba ka ain ka long kumjuh ia baroh la ki dei ki Khasi, Jaintia Garo ne kiwei pat ki jaidbynriew. Kino kino kiba kwah ban shna iing ne pynheh kin hap ban pan jingbit na ka MUDA kaba dei ka bor ba dei khmih ban aijingbit katkum ki kyndon jong ka Meghalaya Building Byelaws.”

U la ong ruh, “Ngim shym la shong kli kti halor kane ka mat.Ha ka jingshisha ngi la shim ia ki sienjam katkum ki ain jong ka byelaws bad ka jingleh jong ngi kam long kaba leh shiliang namar ka jingsngewkhia kaba kaba kongsan jong ngi ka long na ka bynta ka jingshngain jong ki paidbah nongshong shnong ka Jylla.”

Haba shim ia ki sienjam pyrshah ia katei ka jingshna iing beain, u Chairman ka MUDA u pyntip ba ka MUDA ka la phah da ka jingthoh sha utei u trai jaka uba kyrteng u Muhammad Suleman ha ka 22 tarik u Naiwieng 2023 ha kaba la hukum ia u ba u dei ban sangeh mardor ia ka jingtei katkum ka kyndon section 30 A jong ka Meghalaya Town and Country Planning (Amendment) Act, 2004 bad ban wan mih mardor hakhmat ka ophis ha ryngkat ki kot ki sla bad ki jingdro dur kiba iadei bad ka jingshna iing.

“Nga la phah da ka show cause notice. Ngi la ap ia u hynrei um shym la wan mih. Hadien kane sa shisien pat ngi la phah biang da ka jingthoh sha u ha ka 28 tarik u Rymphang 2024, kata katkum ki kyndon section 30 B jong ka Meghalaya Town and Country Planning Act, kaba la kdew ban pynpra noh ia ki jingtei ba khlem ioh jingbit hapoh ka 15 sngi.

“Kumta ruh ha ka 5 tarik u Lber 2024 u Suleman u la wan mih sha ka ophis ha ryngkat ka shithi kaba pynpaw ba um shym la thmu ban pynkhein ia ki kyndon shna iing da kaba shna iing ha ka jaka jong u. U la ong ruh ba u long uba kloi ban kohnguh ia ki kyndon ain ka MUDA. Ngi la bthah ia u ba un aiti ia ki kot ki  sla bad ki dur kiba donkam,” u la ong.

“Kumjuh ruh ka Dorbar Shnong ka la kam ba kim shym la ai jingbit satia ia u ba un shna ia ka iing hynrei katkum ka rekod jong ngi la ai NOC da ka Dorbar Shnong ia u Suleman, bad katkum kata ngi la pyntreikam katkum ki kot ki sla jong u (halor ka jingpan jingbit ban shna iing),” u la bynrap.

U Bah Shylla u la ong ba ka MUDA sa shisien pat ka la pynlong ia ka jingleit jurip ia katei ka jingtei hynrei ka la shem ba ia ka iing la shna ym katkum ki jingdro ba la ai sha ka ophis.

“Ha ka 16 tarik u Lber, sa shisien pat ngi la phah jingthoh biang sha u ba u dei ban pynsangeh shisyndon ia ka jingtei namar kane ka jingtei kam shym la long katkum ka jingdro kaba u la phah sha ka ophis.Ngi la hukum ba un sangeh ia ka jingtei tad haduh ba un da bud ryntih ia ki kyndon. Ngi la khangtala ia ka jaka haduh ba kin da long kiba la pynkhreh ban mynjur katkum ki kyndon tei iing,” ong u Chairman.

Haba kylli, u Bah Shylla u la ong ba ka MUDa ka la shim mardor ia ki sienjam halor ka jingujor ba la ujor da u Rangbah Shnong ka Lumdiengjri.

“Mar ia ioh ia ka jingujor, ka MUDA ka la pynlong ia ka jingjurip ia ka jaka ha ka 30 tarik u Risaw, 2023. Ha ka jingjurip ia ka jaka la lap ba ka don ka jingtei ia ka iing G+2 khlem da ioh jingbit shwa na ka MUDA. Ka ophis ka la leh ruh ia kiwei pat ki jingpeit bniah bad katkum kata ka la pan ia ki kot ki sla na u trai jaka. Ngi la pynmih ruh ia ka hukum ban bthah ia u trai jaka ban sangeh noh ia ka jingtei tad haduh ba un da pynbiang lut ia ki kot ki sla kiba iadei bad ka jingih jingbit na ka MUDA,” u la pyntip.

Ha kajuh ka por, u Chairman u la iathuh ba ka ophis jong u ruh ka la shimkhia tyngeh halor ka jingkynnoh ba la pynpaw da ki paidbah ba don u inspector na ka MUDA, uba la pynpaw ba u trai jaka ba dei peit um donkam ban pan jingbit na ka MUDA namar ba u la dep ban ioh ia ka lain pynpoi um bad ka bording elektrik.

“Nga kwah ban pynshai ba kane ka long kaba bakla namar ba uno uno, uba la ioh ia ka jingpyniasoh um ne bording, u dang hap ban pan jingbit ban tei iing tei sem. Ngi la buh ia ka jingtohkit hapoh ban lap hato u la kren shisha kum kata ne em. Lada lap ba u la kren ia katei ka jingkren, ngin sa leh eiei pyrshah ia u namar ba ka long kaba ialam bakla ia ki paidbah,” u la maham.