Ba ioh COVID ka East Jaintia dawa pyndam ka KSU iaka Inter State Transit Pass

Syllad | The Rising MeghalayaJuly 1, 2020

Hadien ka jingbit khlam COVID-19 u Branch Manager ka State Bank of India, Khliehriat Branch, ka KSU Jaintia Hills District Unit hynnin ka sngi hapoh ka jingialam u Shaniahskhem Dkhar, Assistant Finance secretary ka KSU Jaintia Hills District Unit lem bad u Pynshai Kupar Dkhar President ka KSU Nehu Unit bad kiwei kiwei ki dkhot ka KSU kila leit mar mar ban ia kynduh ia u Bah FM Dopth Deputy Commissioner ka East Jaintia Hills District ban dawa na u pyrkhing iaka leit ka wan na kawei ka jylla sha kawei pat bad ban pyndam shuwa iaka Inter State Transit Pass ban tem iaka jingpur ka khlam COVID-19.

Haka jingiakynduh bad u DC ka East Jaintia Hills ka KSU ka la ioh ban iakren sani bad bad iatai bniah halor kumno ki lad ban shim ban lait na ka jingsaphriang une u khniang, uba la pur sha East Jaintia Hills District na utei u Branch Manager ka Bank SBI.

Haka jingiakren ki dkhot jong ka seng bad u DC la ioh jingtip ba na ka liang une u Bar jylla um shem la pyntip satia sha ka ophis u DC lane khamtam eh sha ki nongialam shnong iaka jingwan jong u shapoh ka district bad kane ka dei shibynta ka jingpynkhein jong une u bar jylla iaki kyndon ba la bthah da ka sorkar. Ka KSU halor kane ka pynrem jur iaka jingbym kheiñ snep une u bar jylla iaka im ka iap u paidbah ka thaiñ dakaba shu wan sah khlem da pyntip sha ki nongialam shnong. 

Ka KSU kala pynpaw ruh iaka jing sngewlyngngoh ban tip ba  une u bar jylla ula ioh rung laitlan lyngba ka Check Point Byrnihat hadien ba u wan na Guwahati khlem da bud ryntih ia ki kyndon ban iada na ka jingpang khlam.

Ka KSU kala pynpaw ba ka sngewphylla, kumno une ubriew u lait ban rung suk khlem da tip la u long uba shait ba khlain ne em? Kane hi ka pyni iaka jinglong tlot ki bor ba dei khmih ban pahara iaka iaid ka ieng ki bar jylla ba wan rung shapoh ka Jylla.

Shuh shuh haba iakren bad u DC la ioh jingtip ba une u briew dei uba lah shah test shwa, hynrei u leit phai biang sha Gawuhatai bad khlem leh test shuh haka por ba u wan biang sha ka jylla.

Ka seng ka la kyntu ruh ia U DC ban pynlong noh mardor ki jingtohkit bad ban wad bniah ba naduh naei u wan? bad bad no u lah ia kren bad iadei kam (contact tracing) khnang ban lah ban teh lakam iaka jingpur sted jong une u khniang bad kumjuh ruh ba ki paidbah ka thaiñ kin shongsuk khlem jingsyier. U DC ula mynjur ban shim khia bad la pynpaw ba ka jingtohkit ka dang iaid shakhmat bad la pyntip ruh ba ia une u briew la buh ha Isolation Centre ia mynta bad u hap ban shong ha kine ki centre haduh da koit syndon.

“Ka office jong u DC kadei ban sangeh shisien don ban ai ki jingbit (Inter State Transit Pass) ia ki bar jylla kiba ban wan sha ka thaiñ EJH kumjuh ia ki VIP bad ki nong trei jong ka sorkar pdeng kiba hapoh ka thaiñ East Jaintia Hills kumba long mynta ba u ne u khlam ula sdang kiew sted bha ha ka jylla kaba marjan bad ngi ka jylla Assam,” ong u kyrwoh bala phah ka KSU.

Kum ban shu pynkynmaw ba ka seng lyngba ka tnat treikam jong ka, ka KSU Malki Circle haki bnai ba la dep ka la leit tuklar ruh ha kum kane ka jingjia ha kaba uwei u bar jylla uba trei ha SBI Administrative Branch Bawri Mansion um shym la bud iaki kyndon ba la bthah da ka sorkar hadien ba u la wan phai na Assam kaba long kawei naki jylla ha ki thain shatei lam mihngi ba bun bha ki ba ioh ia une u jigngpang, ka seng ka la leit ia kynduh mardor ia u AGM kane ka Bank bad ban phah mardor ban leh Quarantine.

Ka KSU ka kyntu ruh iaka office jong u DC kadei ban khang shwa shipor ia ka State Bank Of India (Khliehriat Branch)

Nangta Ka office jong u DC lada ka lap ba une u bar jylla u pynkhein ia ki kyndon ain kadei ban pynshitom kum ki kyndon jong ka ain

Ka KSU lyngba une u kyrwoh ka kyrpad iaki nong shong shnong ba kim dei ban tieng ia une u khniang bad ban iai bud ryntih iaki kyndon ba la bthah daka sorkar bad hakajuh ka por ka kyrpad bad kyntu jur iaki Dobar shnong, ki nongialam shnong bad ki Rangbah shnong hi ba kin sngewbha ba kin long kiba phikir bad ban buddein iakino kino ki briew kiba rung ba mih sha ki shnong ki thaiñ jong ki khnang ba kan nym don ka jingsngew sih hadein ha bud bad ruh ban im shngaiñ khlem jingsyier.

Ka KSU ka ai khublei ruh ia ka dorbar Shnong Khliehriat West Khamtam ia ka kynhun VDP jong ka Shnong Khliehriat West hapoh ka jingialam jong u Bah Joshwa Sajem kiba la treishitom ban wad bniah ia u ne u bar jylla uba dang shu wan trei thymmai hakatei ka Bank.