Ba iohi jngai u Ma Lahkmen sdang iaka Commerce Stream ka Nongtalang College kaba nyngkong eh ha Amlarem Sub Division

Syllad | The Rising MeghalayaJuly 10, 2023

U nongthaw aiَñ ka Amlarem Constituency u ma Lahkmen Rymbui haka sngi Nyngkong ula la plie paidbah iaka Commerce Stream ha Nongtalang College kaba dei kaba nyngkong eh ha Amlarem Sub Division, West Jaintia Hills hadien 51 tylli ki snem ba ioh jylla ba pura ka Meghalaya.

Ka jingioh ban plie bad sdang ia ka Commerce Stream ka dei ka jingshimkhia bad ka jingiohi jngai u nongthaw ain ka Amlarem, u Myntri barim ka tnad Pule Puthi ba donkam ban sdang iaki lain pule jong ki stream bapher bapher katkum ki kyndon jong ka National Education Policy (NEP).

Katkum ka NEP ka pynshlur iaki jingpule ba bunjait ki course haki kolej ban kyntiew iaka pule ka puthi da kaba ithuh iaka sap u/ka khynnah bad ki kolej kiba don tang kawei ka course kin hap ban pyrkhat iaka lawei ka kolej.

Ka jingsdang jong ka jingpule iaka Commerce Stream naduh Class-XI ha ka Nongtalang College ka long hadien 35 snem bala dep seng ia kane ka College ha ka shnong Nongtalang da ka jingthmu ban pynjan ia ki jaka pule sha ki samla pule ha ki thain ba ki shong ki sah.

Kane ka Commerce Stream kan long kaba kyrpang namar shuwa ban plie paidbah la pynrung ia ka Nongtalang College hapoh ka skim People’s College katkum ka notification kaba la pynmih ha ka 9 tarik u Kyllalyngkot 2023. Ka Sorkar Jylla lyngba ka tnat pule puthi kan siew ia ka tulop na bynta san ngut ki nonghikai jong ka Commerce Stream.

Haba kren haka jingialang plie iaka Commerce Stream, u Ma Rymbui ula ong ka jingiaid lynti jong ka Nongtalang College haki 35 tylli ki snem ka urlong dei lyngba ka jingiatreilang jong ka Governing Body, ki nonghikai, ki samla pule bad baroh kiba ïadonbynta bad ka kolej.

Ula ong hapoh ka Jylla la don kumba 80 tylli ki kolej bad na kine duna 20 tylli dei kiba la ioh ka jingithuh da ka NAAC bad u pynpaw ka jingkmen ba ka Nongtalang College kadei kawei kaba la ithuh da ka NAAC.

Haba kyntu iaki khynnah bad samla pule, ula ong ki kmie ki kpa ki la ai ia phi ka lad ym na ka bynta jong ki hynrei na ka bynta ka jingbit jingbiang ka lawei jong ki khun, kumta long ki khynnah bad samla kiba don ka mynsiem trei shitom, iaineh, lenlade bad aiti lut ha kino kino ki jingpule puthi.

Kum ki briew haka jingiaid lynti ki jingbakla, ki jingeh bad jingbym iasngewthuh jingmut kin don beit hynrei wata ai ba kine kin long ki sohkhyrdot ne ki dieng pynkiang iaka lawei baphyrnai jong phi ki khynnah bad samla.

Ula ban jur iaka jingdonkam jong ka CUET khamtam ia kito ki ban ialeh iaka final semester na ka bynta ka Degree Course bad ula ong khlem ka CUET phim nym lah ban bteng iala ka jingpule kaba kham shalor. Kumta ula kyntu iaki samla ban long kiba la pynkhreh naduh mynta khnang ba ynda ki la pass kin nym duh jaka pule.

Ula kyntu ruh ïaki nonghikai ban trei hok ïaka kam khnang ba ki khun u duk u suk ki bym ïohlad ban bteng ïaki jingpule shajngai kin ïoh ban pyndep ïaki jingpule ha kane ka kolej.

Kum ka dak ka jingsngewnguh sngewburom ïaka jinglehbha jong u kum u nongthaw aiñ sha ka ïing dorbar thaw-aiñ, ka Governing Body ka Nongtalang College kala pynkup burom ruh ïa u ma Lahkmen Rymbui.

Iaka jingialang la pyniaid da u principal u Dr RR. Kharkongngor bad la ioh ka jingkren na u Chui Bareh Vice President GB, u H. L. Giri President Governing Body, Min Lyngdoh Waheh Shnong bad na u Kmen Myrchiang Secretary Governing Body.