Ba jur ka jingshah tuh ki kali ar shaka ha West Jaintia Hills, kyntu husiar ka Tnad pulit

Syllad | The Rising MeghalayaJanuary 4, 2025

Ka Tnad pulit ka Jylla ka la kyntu ia ki nongshong shnong ka West Jaintia Hills ba kin long kiba peitngor bad ban pyntip sha ki bor pulit halor kino kino ki jingsuba hapoh ki shnong ki jong ka hadien ka jingkiew kynsan ki jingjia shah tuh ki kali ar shaka hapoh ka district.

Ka Tnad pulit lyngba u kyrwoh ka pyntip ba ki la don bun tylli ki jingjia shah tuh ki kali ar shaka hapoh ka district ha kine ki khyndiat sngi ba la dep.  

Ka pyntip ruh ba na ka liang ki bor pulit ki la pyrshang borbah ban khanglad ia kine ki kam bymman da kaba pynlong ruh ia ki jingiaid pahara bad ki jingkhynra kiba kyrpang ha kaba ki la lah ruh ban ioh kurup noh ia ki katto katne tylli ki thuk thuk kiba la shah tuh.  

Hapdeng kine ki jingjia ki pulit ki la ioh pdiang sa kawei ka ejahar ba la ujor da uwei u nongshong shnong uba kyrteng u Deiwaiarapmi Tang na Mookyrdup, Jowai ha kaba iadei bad ka jingshah tuh ka thuk thuk jong u ka KTM RC 125 kaba don ia u Registration No. ML05W0818 kaba la jia hapdeng ka por 10:30 PM- 1 AM mynmiet jong ka 2-3 tarik Kyllalyngkot.

La kyntu ruh ia baroh ki trai kali ar shaka ba ki dei ban pynieng ia ki ar shaka jong ki ha ki jaka kiba shngain bad ruh ban shim ia ki lad ki lynti kiba lah ban khanglad na ka jingshah tuh. 

Ka Tnad pulit ka kyntu bad pynshlur ruh ia ki paidbah ba kin ai ia ki jingtip ha ka por kaba biang sha ki police station kiba hajan eh lane sha ka Police Control Room ha une u nombor (9774065467) lada ki don ka jingi suba ia ka leit ka wan ha ki shnong ki dong jong ki lane lada don ki kali ar shaka kiba ki i suba ha ka leit ka wan.