Ba jyllei ki kam beaiñ, yn pahara ki Border Wing ka Home Guard ha khappud India Bangladesh

Syllad | The Rising MeghalayaMay 25, 2020

Ban shngaiñ ki shnong ha khappud India Bangladesh, ka sorkar Jylla kala phah da ki Border Wing jong ka tnad Home Guard ban pahara ha shilynter u pud u sam ka jylla ha Khasi- Jaintia haka sngi Nyngkong.

“Ban pynbun shuh shuh ïaki bor pahara nalor ki pulit bad shipai shnong (VDP), ka Sorkar Jylla lyngba ka tnad Home (Police) & Home Guard kala rai ban phah pahara da ki Border Wing jong ka Home Guard ha ki jaka bym pat ker sainar shiah ha shilynter u pud u sam ka India Bangladesh ha Khasi Jaintia ban pyndap ïaka jingduna pulit ha ki Police Station bad Outpost,” ong u Myntri ka tnad Kam Pohïing bad MLA ka War Jaintia Ma Lahkmen Rymbui haka khubor paidbah jong u ka twitter.

Kane ka jingwanrah ïaki Border Wing ka Home Guard kadei hadien ka jingwan thombor ki nong Bangladesh khlieh la ka sngi ha ki shnong khappud ha ki bynta jong ka Dawki bad Muktapur.

Ha kine ki khyndiat sngi ruh kala don ka jingsiat ki shipai BSF iaki nong Bangladesh kiba shah kynnoh ba ki wan tuh maw ha Wah Amsku bad Dawki bad ha kane ka jingjia la don uwei u nong Bangladesh uba la khlad (katkum ki khubor paidbah kiba la saphriang). Nalor kata la kynnoh ba ka jingtuh masi, ka jingtuh dieng ruh kala jur bha ha khappud India Bangladesh naduh Dawki, Muktapur, Hawai Sutnga bad kiwei kiwei ki jaka.

Kine ki shipai Border Wing ka Home Guard kila wan poi haka sngi Nyngkong.

Also Read | Siat ki shipai BSF ia u khar Bangla, jur ka khlong maw, tuh dieng ha khappud India Balangdesh

Ka synjuk ki Waheh Shnong War Jaintia Amlarem lyngba u kyrwoh bala phah da u Daniel Khongsit president, Siang Min George Lacuna secretary kala ai khublei ïa u Chief Minister, u Home Minister ba dei ruh Local MLA u DC, SP West Jaintia, SDO Civil Amlarem ba kila kloi ban phah shipai ban pahara da ki Border Wing ka Home Guard sha Bakur, Dawki Muktapur bad kiwei ki jaka ban iada iaka jingwan rung beaiñ bad tuh ki khar Bangladesh ha ki shnong kiba don ha khappud India Bangladesh.