Ba kyntur pud ka Assam bad bym ioh iaka jingbishar hok haka jingshah siat iap ki 5 ngut rai ‘Boycott’ elekshon MDC ka Mukroh Pyllun

Syllad | The Rising MeghalayaJanuary 11, 2025

Ka Dorbar Shnong Mukroh Pyllun, West Jaintia Hills District kala rai ban Boycott ne ym iashim bynta haka Election MDC sha Jaintia Hills Autonomous District Council (JHADC) ka ban long haka 21 tarik Rymphang.

Ia kane ka rai ka Dorbar shnong Pyllun jong ka Dorbar Shnong kala shim haka jingialang kaba la long haka 9 tarik Kyllalyngkot ha madan Musher, Mukroh kaba la wan iashim bynta da baroh ki nongshong shnong.

Halor kane ka rai, ka Dorbar Shnong Mukroh Pyllun haka 10 tarik Kyllalyngkot kala pyntip da ka jingthoh ha u Deputy Commissioner West Jaintia Hills District Bah BS Sohliya, IAS.

U Secretary ka Dorbar Shnong Mukroh Pyllun Ma Precioustar Sten haba kren sha ki lad pathai khubor ula iathuh ba ka daw ba kin Boycott iaka Election ka long halor ka jingleh jubor ka Karbi Anglong Autonomous Council (KAAC), Assam ia ka shnong Mukroh da kaba tei beain iaka Assam Forest Beat House, ka jingshna jubor iaka surok na Khlieh Sanaro, Mukroh sha Umlaphiah, Mukroh ha kaba ka Sorkar Meghalaya.

Nalor kata ka (KAAC), Assam ha u Naiwieng 2024 kala thombor biang iaka shnong da kaba shna iaka surok bad thom iaka jaka shnong ha Salang, Mukroh bad haduh mynta mynne ka sorkar Meghalaya kam lah ban pynsangeh ia kane ka jingthombor ka KAAC.

Kumjuh ka jingbym shngain ki nongshong shnong ban leit bri namar ka jingshah pyntieng pynsmiej jong ki bor ka Assam bad ka jingbym ioh ka shnong iaka jingbishar kaba hok halor ka jingshah siat iap ki 5 ngut ki dkhot ka shnong kaba la jia haka 22.11.2022.

Halor baroh kine ki jingeh kiba ka shnong kala iakynduh, u Sten ula ong ba bor shnong ka la dep ban pynsngew bad kyrpad iaki bor jong ka sorkar ban iarap bad ban ai jingiada iaka shnong, hynrei haduh mynta ka shnong ka dang hap ban im haki juh ki jingeh.

Kumta halor kine ki nongrim ula ong ba da kawei ka sur ka Dorbar shnong kala sngewdei ban Boycott ia kane ka MDC election kum ka dak ban pyni shaka sorkar iaki jingeh jong ka shnong.

Ula pyntip ruh ba ka rai jong ka Dorbar shnong ka long ba lada ka sorkar ka donkam ban iakren halor ban weng ia kane ka Boycott, kan hap ban wan iakren bad u paidbah haka Dorbar Pyllun jong ka shnong ymtang haki nongialam shnong.