Ba lynshop ki bor mariang ha Rilum Garo: Leit jurip u Myntri Bording ia ki jaka shong shipor ha Dalu

Syllad | The Rising MeghalayaOctober 5, 2024

U Myntri ka Tnad Bording u Abu Taher Mondal ha ka 5 tarik u Risaw u la leit jurip ia ki jaka shong shipor ha Dalu bad ki jaka ba marjan ha West Garo Hills bad iamir jingmut ruh bad ki longiing longsem kiba la shah ktah na ka jingshah lynshop ha ki bor ka mariang.

“Watla ka jinglong jingman ka la kham biang, hynrei na ka liang ka tnat khmih mariang bad ka jingbteng ka jingdum lyoh ka pyni ba ka jinghap u slap ba jur kan dang iai bteng ha kine ki 24 kynta ki ban wan,” u la ong.

“Na ka liang ki bor pyniaid district kynthup naduh u BDO bad ki staff jong u ki la bteng ban pynpoi ia ki lad jingiarap bad pynkynriah ia ki nongshong shnong na ki jaka kiba shah ktah ha kane ka jingjia. La aijingmut ia ki paidbah nongshong shnong ba kin don ha ki jaka kiba shngain na ka bynta kine ki 24 kynta ki ban wan bad ban bud ryntih ia ki jingbthah ha kaba iadei bad ka jinglong jingman ha ka mariang,” bynrap u Mondal.

Nalor kata u pyntip ruh ba baroh ki tnad ba dei khmih ki la ioh ia ka jingbthah ban shim ia baroh ki sienjam kiba donkam. La kyntu ruh ia ki dkhot ka Tnad ka koit ka khiah ba kin leit jurip sha kine ki jaka shong shipor bad ban pynioh ia ki lad jingiarap.

“Ia ka lain bording ilektrik la lah ban pynioh biang kumba marshiteng ha Dalu khnang ban pynioh pyniasoh lyngba ki mobile network bad internet,” ong une u Myntri.

U Mondal u la pynlong ruh ka jingleit jurip ia ka Dalu CHC ban iakynduh ia kito ki briew kiba la ngat ha ki jingmynsaw na ki jingjia shlei um bad twa khyndew.Hadien u la pynlong ia ka jingialang bishar kam bad u Deputy Commission, West Garo Hill kumjuh bad u BDO ka Dalu hapoh Block Office.