Ba mih ka kynrum kynram na ka eksam CUET, dawa shimkhia ka KSU ia u Myntri

Syllad | The Rising MeghalayaMay 17, 2024

Ka Khasi Students’ Union ha ka 16 tarik Jymmang, ka la phah da ka dorkhas sha u Myntri ka Tnat pule puthi u Rakkam A Sangma ha kaba ka la pynpaw ka jingsngewkhia kaba jur halor ka jingmih jong ka kynrum kynram na ka jngpynlong ia ka eksam Common University Entrance Test (CUET) 2024 kaba la long ha ka 15 tarik mynta u bnai hapoh ka Centre jong ka NEHU, Shillong.

Ha ka dorkhat sha utei u Myntri ka KSU ha u kyrwoh lyngba u Chairman ka Education Cell u Pynkmenlang Sanmiet bad u Secretary u Shelkitbok Kharbani ka la ong, “Ngi kyntu jur ia ka ophis jong phi ba kan shimkhia mardor ban khanglad ia kiba kum kine ki jingjia khnang ba kin ym wan jia shuh hadien habud, kata naduh ka jingpynbiang ia ki jaka pynlong eksam, ki jaka shong, jingtreikam ki biometric bad kiwei pat.

Nalor kata ka KSU ka pynpaw ruh halor ka jingdonkam ban pynbun ia ki bor pahara khnang ban weng ia ka jingeh kaba iadei bad ka jingiathynnian bad ban pynthikna na ka bynta ka jingshngain jong baroh kiba wan iakhun ia ka eksam.

Lah ban kdew ba ka jingpynlong ia katei ka eksam CUET ha katei ka sngi ka la pynmih ia ka kynhun kynram kaba la ktah jur ia ki hajar ngut ki samla pule.

Ka KSU ka la ong ba ki samla kiba ialeh ia katei ka eksam kila hap ban ap da ki kynta khlem kano kano ka jingbthah kaba biang ne kino kino ki jingthoh kiban kdew ne btin lynti ia ki ban poi sha ki jaka thoh eksam. Ka jingklumar jingmut kala nang jur haba ki Admit Card kiba la ai da ka NTA kala kdew ba ka jaka thoh eksam ka jong ki kadei ha NEHU Cluster Building, hynrei ka NEHU kala buh ar tylli ki jaka thoh eksam ha ka Non-Science bad Science Cluster Classrooms, khlem da pyntip ha ka por kaba biang ia kiba ialeh ia ka eksam ha kaba ha kano ka Hall kin hap ban shong katkum u Roll Number uba la pynbeit.

Nalor kata ka Seng ka la ong ruh ba ka  jingpynslem ban pynlong ia ka eksam ha ka sobjek English namar ka jingbym treikam ka Biometric System kala pynlong ia ki samla pule ba kin hap shah slap bad kala don ruh ka jingiakhynniat bad jingiatynruh kaba la neh slem bha, kaba la pynlong ruh ia bun ngut ki samla pule ban kyllon bad ban hap aijingsumar.

“Ka long kaba sngew bynniaw bad sngewkhia jur ba ka eksam kaba dei ban long ha ka por 3 baje ym shim la lah ban pynlong ha kaba ki samla pule kila ioh rung ha ka jaka thoh eksam ha ka por 5.15 janmiet hadien ba ki bor pyniaid ka NEHU kila ioh jingbit naka NTA ban pynlong ia katei ka eksamin khlem da donkam shuh ban pyndonkam ia ka Biometric Registration” bynrap ka KSU.