Ba ngi pynsngewbha para briew; ïa kyrsum lang haka bym dei: Pastor GPL Gadew

Syllad | The Rising MeghalayaMarch 17, 2019

LUMSHNONG: “Ha kine ki sngi baroh u briew, tang ban pynsngewbha ïaki para briew, ula ïakyrsum lang haka bymdei lane leh bakla lang kaba buh ïalade haka jingma,” ong u Pastor GPL Gadew.

“Mynta lada phai sha ka shynshar khadar, haka shakri sorkar, haka imlang sahlang naduh na ïing haduh sha bar kam don shuh ka jingshisha ne ka hok. Hynrei baroh ngi la pyndem haka bymdei bad ïa kyrsumlang, ïa mynjurlang ban leh ïa kaei kaei ka bym dei”, la ong u Pastor Gadew haba kren haka Jingiaseng KJP Synod Mihngi kaba 17 ha Balang Presbyterian Lumshnong kaba hap haka Narpuh District, Narpuh Border Presbytery.

Kane ka jingïaseng kala sdang haka 14 tarik Lber bad kala poi sha kaba kut haka Sngi U Blei. Ka matpdeng jong kane ka jingïaseng kadei “To sharai, to ieng skhem ha ka jingngeit” (1 Kor. 16:13).

U Pastor Gadew haba sam ïaka khubor naka ktien U Blei ha kane ka jingïaseng synod haka por 1:30 baje nohphaisngi, ula sot na ka Shithi u Apostol Paul sha ki nong Galatia 1:10 – “Namar hato mynta nga bhoh ïaki briew, ne ïa U Blei? Lane nga wad ïa kaban pynsngewbha ïaki briew? Lada nga dang pynsngewbha ïaki briew, ngam shym long u shakri U Khrist”.

U Pastor Gadew ula ong ba u briew mynta ula wad tang ban pynsngewbha para briew ban ïoh bynta ban sngewbhalang bad u la pyndem ha kaei kaei ka bym dei. Bad ula ong ba “Ka pop mynta kala trei bor bah haka jingim u briew bad ula pyndem haka pyrthei bad klet ïa ka jingshisha”.

Ka pop pyndem bym dei kala ktah ha manla uwei pa ka wei, bunsien ka jia haka jingshongkha kiba ïapher niam kaba jur ka iatan tyllai sha kano ka niam ban pynskhem bad barabor ka la jop ka spah. Ka juh ka jia ha ki kmie ki kpa ki pyndem ha khmat ki khun bad pynbiang ïaka jingdawa jong ki.

Ula ai nuksa ïaka jingjied nongmihkhmat haba u nongialeh ne u kyrtong u pynbam pisa; ki paidbah ki ïa kmen ïaka pisa bad pyndem ïalade bad bam ïaka pisa bad dei tad dor ïalade.

Ha khaii pateng u Khristan ruh u tuh u thok bad ïakyrsumlang haka ahor ka pop bad ka pyrthei ban bamsap bamklop ban ïoh pynsngewbha ïalade.

Haka jingiaseng 10:30 Am, U Pastor RH Lyngkhoi ula sam ïaka khubor U Blei kaba ula sot naka Kitab U Joel 2:13. U Pastor ula khot ïaki para bangeit ka balang Presbyterian ban kylla kaba mut bad ban nym pynsyriem ïalade bad ka pyrthei bad nym ïaleh pyrshah bad ka hukum U Trai.

Ka Synod kaba 18 kan long ha Balang Presbyterian Dkhiah West, East Jaiñtia Hills District.