Ba noh shiliang ki kam pynroi iakynduh ka JNC Nongkhlieh ia ka MLA Sutnga Saipung

Syllad | The Rising MeghalayaAugust 14, 2023

Ka Jaiñtia National Council (JNC), Nongkhlieh Circle hapoh ka jingialam u Nikki Sutnga president haka sngi Nyngkong ka la leit ban aiti da ka dorkhas sha ka MLA Sutnga Saipung ka Kong Santa Mary Shylla ban pynpaw ka jingsngewkhia kaba jur ha kaba iadei bad ka jingshah iehnoh bein ha ka liang ki kam pynroi hapoh ka Elaka Nongkhlieh, EJHD.

Ka JNC ka la ong hadien ba la pynlong ia ka East Jaintia Hills District ha u snem 2012, ki nonshong shnong ka Elaka Nongkhlieh ki la pynpaw ka jingkyrmen halor ka roi ka par ha ka liang ka koit ka khiah, ka pule puthi ka ioh kam ioh jam bad kiwei pat hynrei kane kam shym la long satia kumba la khmih lynti.

Ha u kyrwoh ka seng ka la ong ba ka East Jaintia Hills ka dei kawei na ki district kaba riewspah ha ka jingdon jong ki marpohkhyndew ha ka jylla bad kaba la noh synniang shibun ha kaba iadei bad ka GDP ha ka jylla. Hynrei, ka long kaba sngew bynniaw bad kane ka district EJHD ka la shah iehnoh beain ha ka sorkar jylla.

Ka JNC hadien ka jingiamir jingmut lyngba ka MLA ka thain ka la phah ruh ia ki jingdawa kiba shongnia ia kiba ka la dawa ban pyntreikam noh mardor khnang ban lah ban kyntiew ia ki kam pynroi hapoh ka thain.

Khnang ban weng ia ka jingeh jong ki paidbah ka thain, ka Seng ka la dawa ban shna noh da ka lynti surok  kaba bha na Moolasngi sha Daistong kaba dei ka thain kaba pajih hapoh ka Elaka Nongkhlieh kaba la mad ia shibun ki jingeh namar ka jingbym don ia ka surok kaba biang, kumjuh ha kaba iadei bad ka jingpynioh ia ka umbam umdih, ki jaka aijingsumar bad kiwei pat.Ka seng ka la ong ba ki shnong kiba hap hapoh kane ka Elaka ki la sahkut noh na kiwei pat ki bynta jong ka district ha ka por lyiur namar ki surok kiba sniew kaba la wanrah ruh ka jingduhnong kaba kot sha kumba 90% ha ka liang ka rep ka riang.

Ka seng ka la ong ruh ba ka surok Moolasngi sha Lelad ka dei ka surok ba kongsan na ka bynta ki nongshong shnong namar dei tang kane ka lynti surok kaba pyniasoh ia ki ha ki jingtrei jingktah, ki kam khaii pateng ka pule puthi bad kiwei pat.Kumta ka seng ka dawa ban shim khia mardor ban shna pynbha ia kane ka surok.

Nalor kata ka Seng ka la ong ruh ba man la u snem ka sorkar jyll ka pynlut da ki klur na ka bynta ban kyntiew ia ki jaka sumar ha ki thain nongkyndong kiba pajih ban pynthikna ia ki lad jingsumar.Kumta ruh halor kane ka seng ka dawa jur na ka sorkar ba kan phaikhmat lem sha kane ka Elaka bad ban wanrah da ka  Primary Health Centre (PHC) hapoh Nongkhlieh Elaka kaba dei ka mat jingdawa ba la slem jong ki nongshong shnong ka thain.

Ha kajuh ka por ka Seng ka la dawa ruh na ka sorkar ba kan wanrah Veterinary Dispensary hapoh ka Elaka khnang ba kan long ka jingiarap kaba khraw na ka bynta ki nongri jingri jong ka thain namar haduh mynta hi ym don satia ki veterinary ha ki thain ba marjan jong ka kaba wanrah ka jingeh kaba khraw na ka bynta ki jingri jingdup kiba donkam ia ki jingsumar.

Shuh Shuh ka JNC Sumer Circle kala kyntu iaka MLA ban ban shna iaka surok Samasi sha Pala kaba la sniew tasam bad buh jingeh haka leit ka wan u paidbah khamtam kiba pang ba shitom.