Ba phiel 3 snem ha ka juh ka klas, kyntu u myntri bym dei ban bud tynneng ban jied lain pule

Syllad | The Rising MeghalayaMarch 15, 2020

U Myntri ka tnad Social Welfare jong ka sorkar Jylla u Bah Kyrmen Shylla ula pynkup burom iaki 32 ngut ki khun ka Shnong Shohshrieh kiba la ioh iaka kam sorkar haki tnad sorkar bapher bapher ba kynthup naduh ki nonghikai, doktor, engineer, muktiar, pulit bad professor. 

Ia kane ka jingialang kaba tip kum ka Felicitation Cum Motivation Programme la pynlong da ka Dorbar Shnong Tuber Shohshrieh halor ka phang “Eldest Footstep, A path way to success” ha Tuber Shohshrieh UP School, Wahchlem, East Jaintia Hills District.

U Myntri u Bah Kyrmen Shylla haka jingkren ula ai mynsiem ia kiba la shah pynkup burom bad u ong ba u sngewsarong shi katdei eh ban don bynta lang bad ki ha kum kane ka sngi kyrpang jong ki.

Ula ai ruh ka jingiaroh iaka Dorbar Shnong Shohshrieh kaba la shim iaka sienjam ban ithuh kyrpang iaki nongtrei sorkar bad ong ba kadei lyngba ka jingtrei shitom ka jong ki hi, ba ki sa lah ban poi haka thong jong ka jingjop bad ioh kheit ia u soh bathiang.

“Kane ka sienjam kan long kum ka nuska ia kiwei ki Shnong bad ruh iaki khynnah skul bad samla pule kiba don hapdeng ka jingialeh ban bud iaka dienjat jong ki”, la ong u Myntri.

Ha kaba iadei bad ka jingnang jingstad u Myntri ula kyntu iaki khynnah skul bad samla pule ba ymdei ban shu bud ia kat kaba ki leh kiwei, hynrei kidei ban wad janai bha iaki lain pule ne trei kiba iahap katkum ka sap kaba ki don.

Ban sngewthuh khambha ki khynnah bad ki samla pule ha kaba iadei bad ki jingjied iaki lain pule, u Myntri ula ai nuksa iaka jingmad jong u haka por ba u dang long kum u khynnah skul.

“Haka por ba nga pyndep iaka matriculation, nga shim iaka subjek Science bad nga sngew sarong bha ialade hynrei kaei kaba la pynlong pat hadien, nga la shah bat 3 snem haka Class-XII bad dei hangne nga sngewthuh ba ka jinglah jong nga kam kot bor ban leit da ka Science”, la iathuh u Bah Shylla.

Haoid, ban pynpaw iaka jingkwah jingthrang ban long kum uta/kata kam long kaba sniew hynrei kaba donkam ka long ban sngewthuh ia kata ka bor kaba haduh katno kan lah. Ula kyntu ba haba shah rem ha kano kano ka jingialeh ymdei ban duh jingkyrmen hynrei pynlong iaka kum kawei na ki lad ka ban lam sha ka thong jong ka jingjop.

Ula kyntu ruh iaka Dorbar shnong ban don ka jingiatylli, ka jingiatreilang bad ka jingiasngewthuh jingmut para nongshong shnong khnang ban ioh iaka roi ka par bad ka imlang sahlang kaba suk sain ha baroh ki liang.

U MDC ka thain uba dei ruh u Deputy CEM ka JHADC u Bah Lasky Rymbai ula kren halor ka jingkordor ka pule puthi, “Ka jingnang jingstad ka pynlong ia u/ka briew kaba phuh bapheing, ka jingnang jingstad kadei ka atiar bad ka lad jingiada kaba lah ban pynkylla ia baroh ka pyrthei”.

Ula kyntu iaki samla pule ban shim khia iaki jingpule bad ban nang kyntiew shuh shuh iaka pule ka puthi khnang ban wanrah jingmyntoi iaka imlang ka sahlang bad ha kajuh ka por ula pynkynmaw iaka jinglen lade ki kmie ki kpa ban pynbit pynbiang iaki khun haduh ban da dep ki jingpule.

“Ki kmie ki kpa kidei u paia ba kyrshan iaka iing kasem bad khamtam iaka lawei ki khun ki kti”, la ong u Bah Rymbai.

Ha kane ka sngi la ioh ka jingkren na u K. Muruh Secretary Shnong, u Obil Kyndait, u Genesis E. Kam haka jingialang kaba la pyniaid da u Waheh shnong u K. Ksoo bad la pynphuh pynphieng ia kane ka sngi da ki jingrwai jingshad ba la iashim bynta da ki khynnah skul bad ki seng longkmie.