Ba pynjulor u phria ia bun tylli ki shnong ha WJH, kyrpad jingiarap u MDC ka Shilliangmyntang

Syllad | The Rising MeghalayaApril 17, 2025

U MDC ka Shilliangmyntang u Bah Daeimi Liam u la kyrpad ia ki bor sorkar ba dei khmih ban pynlong ka jingleit jurip kaba kyrkieh bad ban pynkloi ia ki lad jingiarap sha kiba buntylli ki shnong bad ki longiing hapoh West Jaintia HIlls kiba la shah  ktah jur na ka jingshah lynshop na ka jinghap phria kaba jur kaba la jia ha ka 14 tarik Iaiong.

Kine ki shnong kiba la shah pynjulor bad shah ktah jur ha katei ka jingjia ki kynthup ia ka shnong Latymphu A, Latymphu B, Musiaw, Umsalang, Thadbamon, Sookhlieh, Lummuriap, Bhain bad Thadsning. Ha kane ka jingjia kiba bun ki iing ki sem ki la shah pynjulor noh ha kaba bun ki longiing ki la mad jingeh ha kaba iadei bad ki jaka shong jaka sah bad halor ka jingduh noh ia ki jingdon jingem kiba kongsan.

Ha ka shithi sha u Deputy Commissioner uba dei ruh u Chairman ka District Disaster Management Committee, u Bah Liam u la ban jur halor ka jingdonkam kyrkieh halor kane ka jinglong jingman bad kyrpad ruh na ka bynta ki lad jingiarap pisa ban kyrshan na ka bynta ban maramot ia ki iing ki sem bad ki jingduh jingsat.

Nalor kata ula kyrpad ruh ban pynlong ia ka jingleit jurip sha kitei ki shnong kiba shah ktah khnang ban iohi da lade ia ki jingjulor bad ban shim ia ki sienjam halor ki lad ai jingiarap.

“Kane ka jinghap phria kaba jur ka la wanrah ka jingeh kaba khraw hapdeng ki nongshong shnong ha ka constituency ka jong nga, bad kaba donkam kyrkieh ban shim ia ki sienjam ban weng ia kane ka jingeh,” ong u Bah Liam haka shithi sha u DC. “Nga kyntu jur ia ki bor sorkar ba dei khmih ban kin pynkloi ia ki lad jingiarap khnang ba kito kiba shah ktah kin ioh ia ka jingkyrshan ha ka por kaba biang.”

Ia kane ka jingkyrpad la phah ruh sha u Block Development Officer (BDO) ka Laskein C&RD Block, kaba pynskhem ia ka jingdonkam ia ka jingiatreilang na ka bynta ban weng ia ki jingeh namar ki jingshah pynjulor.