Ba pynthymmai challan tang ia ki arngut ki nongkhaii dewiong byrngem ujor PIL ki lai sengbhalang

Syllad | The Rising MeghalayaMay 16, 2019

JOWAI: Na ka daw jong ka jinglehshiliang khmat jong ka tnat Directorate of Mineral Resources (DMR) jong ka sorkar jylla, ka jingangnud jong ki nongkhaïi dewiong ban bteng biang ia ka jingkhaii dewiong naduh lashai ka sngi ka lah ban thud namar ka ophis treikam jong katei ka tnat ka la kyntait ban pynthymmai ia ki challan jong ki.

Kumban shu pynkynmaw ka Supreme Court kala rai ban shah shalan ïa u dewïong bala dep tih lypa, uba don ba palat 75000 metric ton napoh ka Jylla bad kane ka jingailad kan long tang naduh lashai 17 tarik haduh ka 31 tarik Jymmang bad tang kiba la ioh ia ka challan mynshwa kin ioh ban shalan ïa u dewiong.

Hynrei ka ophis treikam jong ka tnad DMR kaba don ha Jowai kam shym la treh ban pynthymmai biang ia ki challan jong ki nongkhaïi bad haduh mynta ka dang pynthymmai ia ka challan tang jong u hynmen u minister u ma Kyrmen Shylla kata u Bison Shylla bad u bah Tuifill Shadap, la kynnoh ki nongkhaii bad ki sengbhalang na rilum Jaiñtia.

Kane ka jingleh jong katei ka tnad ka la pynbitar ia ki nongkhaïi bad sengbhalang.

Ka Ïingkashari kala buh kyndon ïa ka Sorkar Jylla ba kan pynthikna ba ym dei shuh ban don ka jingshalan dewïong ne ka jingtih dewïong da kaba shim kabu na ka jingai jingbit ban shalan haduh 75050 metric ton bad kane ka jingai jingai jingbit ruh ka dei tang halor ki Challan bala dep ban ai.

U Tuesday Lytep, President FKJGP Jaiñtia Hills ula pynpaw ka jingpyrshah kaba jur bad dawa na ka tnad DMR ban kan shimkhia ban pynbeit mardor ïa kane ka rukom ai shalan khnang ban ïa myntoi lang baroh u nongkhaii ym tang ki katto katne ngut.

Ki nongialam ka AJSU, HSU, HYC kila ong ba kitei ar ngut ki briew kiba ioh ban pynthymmai ïa ki challan na ka bynta ka 35 hajar metric ton u dewiong kam dei satia na ka NGT list. Ka jingioh Challan kine ki arngut ka dei tang namar ba ki don ka jingiajan bad ki briew sorkar bad la kynnoh ba yn die rem dor pat sha ki paidbah nongkhaii.

Ki la byrngem ban ujor PIL pyrshah ia ka tnat halor kane ka jingiuhroit ia ka hok jong kiba bun balang bad leh shiliang khmat ia ki.