Ba pyrshah ia ka Investment Promotion Policy, pan jingmut kylla u Bah Paul Lyngdoh ban pynioh ‘land bank’

Syllad | The Rising MeghalayaDecember 31, 2024

U Myntri ka Tnad kam jngohkai u Bah Paul Lyngdoh ha ka 30 tarik Nohprah u la kyntu ia kito kiba pyrshah ia ka Meghalaya Economics and Investment Promotion Policy (MEIPP) ba kin aijingmut lem ban iada na ka rai jong ka sorkar ban thaw ia ki land bank (jingthied bad jingbuh jaka da ka sorkar) na ka bynta ki kam pynroi.

Kane ka jingpynpaw jong u Myntri ka long ruh kum ka jingkynthoh ia ka jingpyrshah halor ka rai jong ka sorkar ban pynkylla ia ka Meghalaya State Investment Promotion Facilitation Act, kaba thmu ban aibor ia ka Investment Meghalaya Agency (IMA) ban thied jaka bad ban ai pateng sha ki nongseng kam seng jam.

“Lada phi ong em ia ka policy jong ka sorkar, kumta ruh kaei pat ka lynti ia ka jingong em ka jong phi? Wan shakhmat bad pyni sha ngi ia ki jingai jingmut jong phi da ka jingthoh. Lada kan kham biang ban ia ka policy ka jong ngi, ngi lah ban iaid da katei ka sienjam,” ong u Bah Paul haba kren sha ki lad pathai khubor.

Da kaba pynpaw ba ka MEIPP ka dei ka policy ia kaba la mynjur da ka iingdorbar thaw ain ka Jylla, u Bah Paul u la ong, “Kumta ka jingthaw ia kine ki land bank na ka bynta ki kam pynroi ka dei kaba mih lyngba kane ka policy.”

U Myntri u la kular ruh da kaba ong, “Ha kajuh ka por, lada donkam ban pynbha ia ka policy, nga sngew ba kane ka dei kaba lah ban leh ha kano kano ka por namar nga ngeit halor ka jingong, “Ka jaka kaba heh tam ha ka pyrthei ka dei ka jaka jong ka jingpynjanai. Kumta ngi lah ban nangpynjanai ia ka policy.”

Halor ka jingtyrwa ia ka jingdonkam ban iasyllok bad ki kynhun bapher bapher, u Myntri u la ong, “Kane ruh ka lah ban iarap namar ym don kano kano ruh kaba shu kut beit noh namar wat ka Riti Synshar jong ka Ri India ruh kaba la khein ba ka dei kaba jrong tam ha ka pyrthei hynrei ka dei kaba la pynkylla thymmai lah palat 100 sien. Kumta kam don satia kano kano kaba rai kut ha ka kam synshar khadar. Kumta ruh haba phai sha ki kam thaw ain, kam ju don full stop, ki don beit tang ki coma.”

Haba kylli ha kaba iadei bad ka jingsngew ba kan don ka jingshah knieh noh ki jaka puta bad ka khyndew ka shyiap jong ki trai shnong riewlum, u Bah Paul u la ong, “Lada phi pule ia ka MEIPP, ki don ki bynta kiba iadei bad ka green economy, ka jingbhah kam ia ki samla trai shnong, hynrei ban shu ong beit ba kan don ka jingkurup ia ka khyndew ka shyiap kam long kaba dei. Ka jingmut hangne ka long ba ka sorkar ka dei ka trai jong ka jaka puta bad ia kane ka jaka kan shu aiwai sha ki kompeni bapher bapher. Haba ngi ong kompeni, nga sngew ba ka la dei ka por ba ki briew jong ngi ki dei ban iasnohkti lang bad thaw ia ki kompeni. Hangno ka don ka jingeh. Ngi la poi ha ka kyrdan ba ki briew jong ngi kim dei tang ki nongwad kam hynrei ki dei ruh ki nongai kam. Kumta balei ngim ioh 500 – 1000 ngut ki nongseng kam seng jam na Meghalaya ban thaw ia la ka jong ka kompeni bad ban ai wai ia kine ki jaka katkum ka policy jong ka sorkar.”

Nalor kata haba ai nuksa ia ka New Shillong Township Agency bad ka MIDC, MTDC kiba thied jaka, hynrei ki jaka ki iai sah ki nongkynti jong ka sorkar, ong u Myntri da kaba bynrap, “Ka jingkylli kaba iadei bad ka jingduh noh ia ka hok halor ka khyndew ka shyiap kam mih satia.”

“Ki projek jong ka tnad jngohkai pyrthei kum ka Polo Orchid, Jivas ha Sohra – kine baroh la ai wai sha ki riew shimet hynrei ka jinglong trai ka sah ha ka sorkar, kumta nga sngew ba kane ka dei kawei ka bynta ki briew ki sngewthuh bakla. Kumta lada ki kwah ban ai jingmut, ki dei ban wan shakhmat. Wan bad ai jingmut kaei kaba lah ban leh lada kane ka policy katkum ka jingsngew jong phi kam long kaba dei,” u la pynpaw shuh shuh.