Ba pyrshang shukor ia ki pulit, shah kem 4 ngut ki mentuh, ioh kurup ki nar rod ba T.10 lak

Syllad | The Rising MeghalayaAugust 12, 2024

Ki bor pulit ka East Khasi Hills ki la ioh ban kem noh ia sawngut ki nongtuh kiba dei ki nongniah bad nongbud trok halor ka jingpyrshang ban shukor ia ki pulit halor ka kam bymman jong ki ban die tuh ia ki nar rod kiba shongdor haduh kumba T.10 lak.

Na ka liang u SP ka East Khasi Hills, u Bah Sylvester Nongtyngnger lyngba u kyrwoh u la ong ba kine ki sawngut ki briew kiba la shah kem noh ki dei kiba la tip kyrteng kum u Deibormi Mukhim (40), u Robert Shadap (25), u Babiangbor Mylliem (38) bad u Shopstarwell Jana (35 snem rta).

Une u heh pulit u pyntip ba ha ka 9 tarik mynta u bnai ki pulit ki la ioh pdiang ia ka ejahar na u Deibormi Mukhim bad u Robert Shadap kiba la pyntip ba ha ka 8 tarik mynta u bnai katba ka trok 12 shaka  jong ki kaba don ia u nombor NL-01-K-6051 kaba kit nar rod ka dang ieng ha surok Mawryngkneng by-pass, ki la don saw ngut ki briew ki bym lah ban ithuh kiba rah da ki wait kiba la wan rung jubor hapoh ka trok ka jong ki ha ka por kumba 8:50 mynmiet ha kaba ki la patan jubor ia ki ha kawei ka kali Alto 800 ka bym don satia u registration nombor.

U la ong ba kine ki arngut ki briew ha ryngkat uwei pat u nongniah jong ka trok ki la shah bat baroh shi miet hadien ba la pyllait noh ia ki tad ha ka step 9 tarik mynta u bnai ha Pynursla.

Hynrei, na ka liang u heh pulit u la ong ba ha ka jingtohkit ki pulit ki la lap pynban ba u Deibormi Mukhim bad u Robert Shadap ki la ia suhbuit lypa ban pynhiar ia kine ki nar rod ha Pommura bad hadien kane, ki la pynkit pat ha kawei ka trok ba don ia u nombor ML05-T-3858.

Hadien ka jingtohkit bniah ki pulit ki la ioh kurup noh ia kine ki nar na Laitkyrhong bad Jongsha ha kaba baroh kine ki nar rod ba la ioh kurup ki don haduh kumba 18.5 ton bad kiba shongdor hapdeng ka T.9.5 lak haduh  T.10 lak.

Kumjuh ki pulit ki la lapdien ruh ia ka trok 12 shaka kaba don ia u registration no. NL-01-K-6051 ia kaba la pyntip ba ka la jah na ka shnong Mukhla, West Jaintia Hills, katba ia ka trok kaba don ia u nombor ML05-T-3858 ba la pyndonkam na ka bynta kane ka kam bymman la ioh kurup na 7 Mer Baniun, Upper Shillong.

Ha kaba iadei bad kane ka jingjia na ka liang ki pulit ki la register case hapoh Mawryngkneng Police Station hapoh ki kyndon 309 (4)/137 (2) jong ka BNS bad ka jingtohkit pyrshah ia kine ki sawngut ka la iaid shakhmat.