Ba rejistar ki nong Jaintia ia ki kali thymmai sha Shillong shah ktah ka jingioh lum khajna: CEM JHADC

Syllad | The Rising MeghalayaMarch 9, 2024

U Chief Executive Member ka Jaintia Hills Autonomous District Council (JHADC) u Ma Thombor Shiwat u la ong ba ka jingleit registar jong ki briew napoh Jaintia Hills ia ki kali thymmai sha ka nongbah Shillong ha ka jaka la ka jong ka district ka la ktah ha kaba iadei bad ka jingioh lum khana lyngba ki kali.

Ia kane u CEM u la pynpaw ha ka por ba la pynlong ia ka jingiatai kynhun ne General Discussion hapoh ka Dorbar Mangtyngka ha ka 8 tarik Lber.

U la ong ruh ba ka Council ka la shu ioh ia ka bhah ha kaba iadei bad ka jinglum khajna tang lyngba ki marpoh khyndew kiba kongsan, ki khajna na ki kali bad ki marpoh khyndew kiba rit ba ria na ka sorkar Jylla. Nalor kata u la bynrap ba na ka liang ka sorkar kam ju aijingtip sha ka Council ha kaba iadei bad ka jingioh lum khajna kaba thikna na ki marpoh khyndew kiba kongsan, kiba kham rit bad lyngba ki khajna na ki kali.

Nalor kata u Ma Thombor u la ong ruh ba ka sorkar ka la pynlong ia ki jingialang bad baroh ki laitylli ki Autonomous District Councils (ADC) ka Jylla ha ka nongbah Shillong na ka bynta ban iamir jingmut ha kaba iadei bad ka building bye laws, bad na ka liang ka sorkar ka la mynjur ban pynmih ia ka jingpynbna ne notification ka ban aibor ia ka ADC ba kin pyntreikam ia kane ka ain shna iing ha ki jaka kiba shabar ka jingkhmih jong ka Municipal Board.

U CEM u la ong ruh ba kawei na ki jingshim rai ba la shim da ka Executive Committee na ka bynta ban kyntiew ia ka jingioh lum khajna ka long halor ka jingdonkam ban ioh ia ka no objection certificate na ka Counsil na ka bynta ban shna ia ki jaka shangkai ne tourist spot, hotel, ki jaka sahkai pyngngad bad kiwei kiwei.

U la ong ruh ba ka Council kan kyntiew ruh ia ka dor ai wai jaka bad ka donkam ruh ban pynthymmai na kaei kaba la dep pynbeit ha kine ki lai bad sawphew snem kiba la leit noh.

Ha kaba iadei bad ka jinglait tuh jong ka khajna na ki kam khaii dewiong beain kumba la kdew da u MDC ka Central Jowai u Bah A Andrew Shullai, u CEM u la ong ba kin pyrshang ban wad ia ki lad ki lynti ban khanglad ia kane ka jinglait tuh khnang ba kan long ka jingmyntoi ia ka Council.

Ha ka jingkren pynkut, u Shiwat u la ong, “Kam don jingmut tang ban bat ia ki katto katne ki kam kiba halor lada phim don ia ka jingkitkhlieh bad ban trei hok iala ka jong ka kam.Nga kyntu ia baroh ki ophisar khamtam ka Tnat Forest, Taxation, Revenue ba kin shim ia ka jingkitkhlieh, ban trei minot bad don ia ka mynsiem iatreilang na ka bynta ban lah ban kyntiew ia ka jingioh lum khajna.”

Ki MDC kiba la iashim bynta ha kane ka jingiamir jingmut ha ka Dorbar Mangtyngka ki kynthup ruh ia u MDC ka War Central u Hollando Lamin bad u MDC ka Sutnga Nongkhlieh u Richard Lyngdoh.

Wanrah u CEM ka JHADC ia ka Mangtyngka ba duna T.13.59 klur na ka bynta u 2024-25