Ba sbun ka Mukhla Dorbar Pyllun, ioh jaka ialehkai Cricket ba paka ka West Jaintia Hills DCA

Syllad | The Rising MeghalayaJanuary 5, 2025

Ha ka sienjam kaba kongsan kaba thmu ban kyntiew ia ka kam ialehkai Kriket ha baroh ki district jong ka Jylla, ka Meghalaya Cricket Association (MCA), ka West Jaintia Hills District Cricket Association (WJHDCA) bad ka Mukhla Dorbar Pyllun ha ka 4 tarik Kyllalyngkot 2025, ki la ia soi ia ka jingiateh kular ban shna ia ka madan ialehkai Kriket kaba paka ha ka shnong Mukhla, West Jaintia Hills.

Kane ka la wan long ruh hadien ba ka WJHDCA ka la lah ban pynioh ia ka jaka kaba heh haduh 5.92 akar ban shna ia ka madan ialehkai Kriket kaba thymmai da kaba weng noh ruh ia ka jingsngew bynniaw kaba la iakynduh kham hashwa hadien ka jingpulom ka jingthmu shna jaka ialehkai hapoh ka shnong Ummulong, kaba la dep ruh ban iasoi iaka jingiakut.

U General Secretary ka WJHDCA u Bah Waibor Sohlang lyngba u kyrwoh u la pynpaw ba na ka liang ka MCA naduh kine ki khyndiat snem ba la dep ka la buh ia ka thong kaba hakhmat eh ban kyntiew ha ka jingdon ia ki madan ialehkai kriket ha kylleng ki district jong ka Jylla khnang ban lah ban kyntiew ia ki sap ki phong jong ki samla. 

La lah ban pynurlong ia kane ka jingpynioh jaka lyngba ka jingtrei borbah jong ka WJHDCA nalor ka jingkyrshan ba radbah na u MLA ka thain u Bah Wailadmiki Shylla uba don ka jingsngewtynnad ia ka jingialehkai kriket ha ryngkat ka Mukhla Dorbar Pyllun. 

Ha katei ka jingialang iasoi ia ka jingiateh kular hadpeng ki lai liang (A tripartite lease agreement) la pyniaid da u Bah Eddystone Shylla, President ka WJHDCA la ia don lang baroh kiba ia don bynta ha kane ka kam kaba kynthup ia u MLA ka thain u Bah Wailad Shylla, Naba Bhattacharjee, President ka MCA; Rayonald Kharkamni, Vice President ka MCA; Dhrubajyoti Thakuria, Treasurer ka MCA; Waibor Sohlang, Secretary WJHDCA; Hamran Shylla, President ka  Mukhla Dorbar Pyllun nalor u  Hachwa Suna, General Secretary ka Mukhla Dorbar Pyllun.    

Ha ka jingialang u President ka MCA u la pynpaw ka jingsngewnguh ia ka Mukhla Dorbar Pyllun halor kane ka jingjynsur mynsiem jong ka ban pynioh ia kane ka jaka kaba heh kaba don harud surok, kata tang khyndiat kilometre na ka surok highway. Kane ka jaka ka ai ruh ia ki lad pyniasoh kiba bha bad pynsuk shibun bad kaba pynlong ka jaka kaba biang pura kum ka madan ialehkai kriket.  

Hashwa ka jingiasoi ia ka jingiateh kular la pynlong ruh ia ka jingleit jurip bniah ia kane ka jaka da ka kynhun baroh kawei kaba la pynpaw ia ka jingsngewhun kaba pura ia ka jinglong jong ka jaka bad ka jingbiang ban pynlong kum ka madan ialehkai kriket kaba biang pura.  

Nalor kane ka madan kriket, ka la don ruh ka jingthmu kaba la iaid shakhmat na ka bynta ban shna ia ka madan phutbol kaba biang pura ha ka jaka kaba marjan bad ka ban kyntiew shuh shuh ia ki jingtei na ka bynta ki kam ialehkai sports ha ka thain.