Ba sdang tyrkhong ki tyllong um, kyntu u CM ban aijingiada ia ki Catchment Area

Syllad | The Rising MeghalayaMay 5, 2024

U Myntri Rangbah ka Jylla u Conrad K. Sangma u la buh ka jingkyrpad ia ki nongshong shnong ka Jylla ban iatreilang lang ryngkat ki bor shnong na ka bynta ban aijingiada ia ki jaka ba don um ne ki Catchment Area kiba lah ban duh noh namar ki kam tih maw tih shyiap bad kiwei pat ki jingtrei jingktah khnang ban lah ban tehlakam ia ka jingtyrkhong jong ki tyllum um ha ka jylla.

Ia kane u Myntri u la pynpaw ha ka jingleit jurip ia ka Umjasai Catchment Area kaba la sdang tyrkhong ha khlaw Lawsohtun Shillong ha ka 4 tarik Jymmang ha ryngkat ka jingsynran lang da ki heh sorkar na ka Tnat PHE, Urban Affairs bad na ka Meghalaya Basin Development Authority. 

Kane ka jingring tyrkhong ha ka mariang ka la wanrah ka jingkyrduh um ha baroh kawei ka Jylla namar ka jingsdang rngat jong ki tyllong um bad kaba la wanrah jingeh ruh ia ki paidbah nongshong shnong.

Kane ka jingleit jurip ka la wan long ruh hadien bun tylli ki jingialang ba la khot pynlong da u CM ban iamir jingmut halor ka jingkyrduh um ha ka Jylla.

Haba kren sha ki lad pathai khubor u CM u la ong, “Ha kine ki shi snem ba la dep, ka sorkar ka la shim ia kiba bun ki sienjam ban pynneh pynsah bad tyngkai ia ki wah duid ki shyngiar kumjuh ia ki wah.”

U la ong ruh ba nalor ki projek kiba heh kiba iadei bad ka jingpynbiang um, ka sorkar ka la shim ruh ia ki sienjem ban ithuh kyrpang bad ban pynneh pynsah ia ki catchment area. “Ngi dei ban tyngkai ia ki tyllong um bapher bapher ha ka Jylla bad ban ialeh ban pynlang ia ka um katba lah, kata da kaba pyndonkam da ki lad ki lynti bapher bapher jong kane ka juk.”

Nalor kata u Conrad u la ong ruh ba ka sorkar ka la shun ia buntylli ki check dam ha ki bynta bapher bapher jong ka Jylla na ka bynta ban pynlang um. “Ngi la hap ban mad ia ki por kiba eh, hynrei da ka jingtuklar ka jong ngi ngin lah ban tehlakam pat ia ka jinglong jingman baroh ha kine ki snem ki ban wan,” u la bynrap.

Ha kajuh ka por u CM u shim ruh ia ka kabu ban kyntu ia ki paidbah nongshong shnong ba kin shim hi da lade ia ka jingkitkhlieh na ka bynta ban tyngka ia ka um ha la ki jong ki iing ki sem, bad u la pynthikna ruh ba ka sorkar kan ym shah ia kino kino ki kam tih maw, tih shyiap bad kiwei pat hajan ki catchment area khnang ban lah ban aijingiada ia ki tyllong um.