Ba shah khang lehniam ha Krem Mawjymbuin, ujor ka seng niam Hindu sha ka High Court

Syllad | The Rising MeghalayaAugust 7, 2024

Namar ka jingsngew bynniaw halor ka jingbym ioh jingbit (NOC) na ka Dorbar Shnong Mawsynram (DSM) na ka bynta ban pynlong ia ka jingleit leit niam ba shisien shi snem shapoh ka Krem Mawjymbuin kaba don ha Mawsynram, na ka laing ka Yatra Committee jong ka seng niam Hindu ha ka 6 tarik mynta u bnai ka la ujor pyrshah sha ka Iingkashari High Court ka Meghalaya ha kaba ia ka jingpynsngew kaba nyngkong la pynlong hynne ka 7 tarik bad yn bud sa kawei pat lashai ka sngi 8 tarik Nailar.

Lah ban kdew ba ka Yatra Committee ka la phah da ka jingujor WP(C) ba la rejistar kum ka no. 275- 2024 pyrshah ia ka Jylla Meghalaya bad phra ngut kiwei pat ki nongshah mudui ha kaba u S. Jindal, Advocate bad u B.Jyrwa, Advocate ki mihkhmat ia ka Yatra Committee katba u T. Yangi B, Additional Advocate General lane AAG bad u H. Abraham, Advocate Sorkar lane u GA ki la mihkhmat ia ka Jylla Meghalaya.

Haba shong bishar, u Advocate S Jindal u la pyntip ba ka yatra kaba man la u snem ka dei ka kam kaba iai bteng bad naduh u snem 2011 ter ter, ryngkat bad ka jingthaw ia ka society la pynlong kham ryntih bad pynbeit, bad ia ka jingleit leh niam la ai jingbit da ki bor pyniaid District naduh u snem 2011 haduh u snem 2023.                    

U la ong ruh ba ki Dorbar Shnong ha baroh kine ki bynta ba la dep ruh ki la ai ïa ka No Objection Certificate bad ka jingbit, bad ba kino kino ki kyndon kiba la buh la bud pyrkhing bha.

U Jindal u la pyntip ba mynta u snem, watla ka jingbit kaba nyngkong  la ïoh ha ka 27 tarik Jylliew, 2024 na ki bor pynïaid District ryngkat ki kyndon ba ki nongpynïaid ki dei ban ïoh ïa ka No objection Certificate na ka Dorbar Shnong, Mawsynram. Hynrei watla ki la pyrshang ban iakren bad ki bor pyniaid ka Dorbar hynrei kam shym la don satia kano kano ka jubab bad hadien ki shu ioh jingtip tang ia ka jingkyntait ban ai NOC lyngba ki lad pathai khubor.

Nalor kata u la ong ruh ba ym shym la don kano kano ka jingpyrshang ban buh ia kano kano ka jaka mane blei kumba la pynpaw bad ba baroh ki snem tang kawei ka kam kaba la ju leh, kata ka long ban synreit um ha ki lingam ne ka shap jong ka Shiv ling u Blei Shiva, bad ba kam don kano kano ka jingthmu ban pynmong ia ki jingsngew lane thaw ia kino kino ki jingpynthut ha kata ka jaka ba la kdew. U la kyrpad ruh sha ka Kashari ban ai jingtip sha ki bor synshar District bad ki riew shimet bad ia kita ki hukum kiba biang dei ban ai hadien kata.

Katba na ka liang u Yangi B u la kyrpad ba yn ailad ba un ioh ia ki jingbthah kiba dei biang bad ka pynpaw ruh ba namar ba ka kam ka dei hok ban bishar, lah ban ailad ia u shisngi ban ioh ia kajuh.

Ha ka jingpyrkhat ba la bishar bniah jong ka Kashari High Court, namar ba ka kam ka long kaba khia bad ka dei hok ban bishar kyrkieh bad na ka bynta ban pynbeit ia kane ka kam, ka Kashari ka la bthah ia ka Deputy Commissioner, East Khasi Hills District ba kan buh ia u Ophisar uba don ka jingkitkhlieh ban pyntip sha ka Dorbar Shnong Mawsynram bad kiwei ki ban don ha ka Kashari lashai ka 8 tarik sngi Palei ryngkat bad ka Deputy Commissioner ka EKH, u Superintendent of Police ka EKH ha ka por 2.00 baje nohphai sngi.