Ba sniew ka surok Jowai Silchar kylla ki trok bitar ka KSU bad EJHDA

Syllad | The Rising MeghalayaAugust 14, 2019

JOWAI: Ka East Jaintia Hills Driver Association (EJHDA) bad ka Khasi Students’ Union (KSU) ki la pynpaw ia ka jingbitar jur halor ka jingbym shimkhia ka NHAI bad ka sorkar Meghalaya ban maramot ia ka surok na Jowai Silchar kaba la jot rathai kaba la dap da ki thliew ki syar ha kylleng ki jaka.

Haka sngi Balang, ar tylli ki trok kila aksident haba kawei ka la sahkut katba kawei pat ka la kylla tang namar ba kila iuh ia ka thliew kiba dap um bad kaba jylliew kumba 2 phut kaba don hapdeng surok ha shnong Dkhiah West, hajan ka Ieng Swer Memorial Secondary School.

“Nga la iohi da ki khmat lajong ba kawei ka shaka ka trok ka la ngam ha ka thliew bad u driver um lah shuh ban tehlakam iaka trok bad iaid shabar ka surok bad ka la kylla”, la ong u Kyntang Phawa, Vice President ka EJHDA.

Nakaliang ka KSU, ka la pynpaw ia ka jingbitar kaba khraw halor kane ka jingjia.

“Ka sorkar ka la pyllut palat 600 klur ban pynbha ia ka surok na Soomer shaduh sha Malidor bad ka Company kaba trei ia kane ka surok kala torti bad kam shym la maramot iaka surok kaba la wanrah ka jingbym shngain iaka leit ka wan ki kali bad ki paidbah. Donbok ha kine ki jingjia ym shym la jia eiei ia ki khynnah skul jong ka Ieng Swer Memorial Secondary School wat ka jingjia kala jia ha ka por wai Skul”, la ong u Finance Secretary ka KSU, u Streamly Niangti.

“Kum ka seng kaba peit ia ka bha ka miat ki paidbah, ngim banse wat ban leit khang iaka Tollgate kaba don ha Lumshnong namar kam myntoi ba kan shu khrong pisa na ki paidbah, katba ia u surok kam shym la pynbha,” la ong u Streamly.