Ba thmu wan ka seng ialap khang bam doh Masi ha Shillong Press Club, syrtap ki pulit

Syllad | The Rising MeghalayaSeptember 12, 2024

Ka Shillong Press Club haka 12 tarik Nailur ka la sakhi ia ka jingpyrkhing pahara jong ki pulit hashwa ba ka Seng Jagatguru Shandkaracharya Swami Avimukteshwarananda Saraswati Ji Maharaj ba la ialam da u Brahmachari Mukundanan kan pynlong ia ka jingialang bad ki lad pathai khubor ha ka por 1 baje nohphai sngi ban kren halor ka  jingkhang bam doh Masi.

Kane ka jingpyrkhing pahara jong ki pulit ka la wan long ruh hadien ba ka kynhun jong ka Seng Hynniewtrep Youth Council (HYC) ka la wan poi hapoh Shillong Press Club ban pynpaw ka jingpyrshah kaba jur ia kane ka kynhun bad ruh ban iakynduh ia ki.

Ka kynhun jong ka HYC hapoh ka jingialam u president u Bah Roy Kupar Synrem ka la shah bat noh ha ki pulit shabar kane ka jaka ba thmu pynlong jingialang.

Na ka liang u Bah Synrem u la ong ba ka seng HYC kam don ka jingthmu ban pynsangeh ia kane ka kynhun ba kan pynlong ia ka jingialang bad ki lad pathai khubor hynrei tang ban ioh buh jingkylli ia ka jingthmu ka jong ki.

 “Kane ka long ruh namar ngi la sakhi kumno ba ki la aijingkren ha Arunachal bad ha Nagaland ha kaba ka jingthmu ka jong ki ka long ban khang pyrshah halor ka jingpyniap Masi bad bad khang bam doh Masi,” u la ong.

U la ong ba ha Meghalaya ki nongshong shnong ki dei kiba bam ia ka doh Masi, bad kumta kim lah ban wan hangne bad ban khang ia kaei kaba ngi bam. Kumta ngi kwah ban tip ia ka jingthmu ka jong ki,” u la bynrap.

Nalor kata u la ong ruh ba kin ym ailad satia ia kane ka kynhun ba kan pynlong ia kino kino ki rally hapoh Meghalaya.