Ba thurmur ka jingpynlong ia ka eksam NEET: Shimkhia ka sorkar ban iakren bad ka NTA 

Syllad | The Rising MeghalayaMay 8, 2024

U Myntri Rangbah ka Jylla u Conrad K Sangma ha ka 7 tarik Jymmang, u la pynthikna ba ka sorkar Jylla ka la shim ia ka bynta ban pynlong ia ka jingiakren bad ki bor pyniaid jong ka National Testing Agency’s (NTA) halor ki jingkynnoh leh thurmur ki jong ka ha kaba pynlong ia ka eksam National Eligibility cum Entrance Test (NEET) ha Jowai, West Jaintia Hills District.  

Kane ka la wan long ruh hadien ba ki sengbhalang kaba kynthup ia ka Khasi Students’ Union (KSU) bad ka Jaintia Students’ Union (JSU) ki la dawa ba dei ban pynlong biang da kawei pat ka eksam na ka bynta kine ki samla pule kiba la ngat ha kane ka apot.

Haba pynpaw lyngba ka rynsan social media, u Conrad Sangma u la ong, “Ia ka eksam NEET la pynlong da ka central agency ka National Testing Agency (NTA), bad ha  kaba iadei bad ki jingsngewkhia halor ka jingpynlong ba dang shen ia kine ki eksam ha ki bynta bapher bapher ka Jylla, na ka liang ka sorkar ka la shimkhia ban iakren bad ki bor ba dei khmih.”

Na ka liang ka KSU bad ka JSU haka 7 tarik Jymmang, ki la dawa na ka sorkar Jylla ba ka dei ban pynlong biang ia ka Eksam NEET na ka bynta ki samla pule na ka thain Jaintia Hills hadien ki jingkynnoh ai jingkylli bakla ha ka por ba pynlong ia kane ka eksam ha ka 5 tarik mynta u bnai.

Kine ki ar seng ki la ong ba ki la jingtip ba ha ka por ba la pynlong ia ka eksam, ki samla pule ki la ioh pdiang ia ki ar bynta ki jingkylli ba la thoh MNOP bad QRST. Kane ka la pynklumar jingmut hapdeng ki samla kiba ialeh ia kane ka eiksam ha kaba wat ki nongpyniaid ia ka eksam ruh ki sah ha ka umdum ba ia kano ka jingkylli kaba ki dei ban thoh,” ong katei ka jingujor.