Ba tuklar mardor ka CM Connect ioh biang ki nongshong shnong ia u khaw rashon haka shnong Koraibari ha Ranikor

Syllad | The Rising MeghalayaFebruary 23, 2025

Ka jingshimkhia bad tuklar mardor lyngba ka CM Connect ka la iarap ia ki nongshong shnong jong kawei ka shnong ha ka jylla ba kin ioh biang ia u khaw rashon uba ki la duh lyngba ka National Food Security Act (NFSA).

Ki nongshong shnong jong ka shnong Koraibari kaba hap hapoh Ranikor ki la ujor sha u Myntri Rangbah ka Jylla u Conrad K Sangma halor ka jingbym ioh ia u khaw rashon man la u bnai lyngba ka NFSA na u nongsam rashon ne Fair Price Shop (FPS).

U Lipson Ch. Sangma uba dei u nongsam rashon la kynnoh ba u la kyntait ban sam sha ki katto katne ki nongioh jingmyntoi katkum ka hok kaba ki dei ban ioh lyngba ka jingsam rashong. Ha ki por kiba la leit ruh ka la don ka jingiapait iapra bad ka jingmih kynhun hapoh ka shnong kaba la pynlong pat ia ki katto katne ki paidbah ba kin duh ia ka hok ka jong ki.

Ha ka jingleit jngoh sha katei ka jaka ha kine ki khyndiat sngi ba la dep, u Myntri Rangbah u la pynthikna ban leh da kaba tyngeh halor kane ka jingkynnoh da ki kynhun bapher bapher. U la iakynduh ruh ia ki trai shnong ha Ranikor bad pynthikna ban pynioh ia ka jingbishar hok.

Ka Director ka Tnad Supply ka Kong Anita Kharpor ka la thoh mardor sha u Deputy Commissioner ka South West Khasi Hills, bad bthah na ka bynta ban pynlong ka jingtohkit halor kane ka phang bad ban shim ia ki sienjam kiba donkam.

Ha ka 17 tarik Rymphang, ka kynhun tohkit na ka Tnad Supply ka la leit jurip sha katei ka shnong bad pynlong ia ka jingtohkit kaba bniah. Hadien ka jingpynthikna ba ki don bun ngut ki nongioh jingmyntoi kiba la shah pynduh noh ia ki hok rashon jong ki lah palat shi snem, bad ha ki katto katne ki khep haduh ar snem ki la shim mardor ia ki sienjam.

Hadien la pynduh noh ia ka laisen sam rashon bad la bthah ba un aiti noh ia baroh ki kot ki sla. Nalor kata la shim ruh ia ki sienjam ban wanrah pat ia ka jingsngewthuh jingmut hapdeng kitei ki ar kynhun hapoh ka shnong Koraibari bad ban pynthikna ban wanrah pat ia ka jingiabha na ka bynta baroh.

Na ka liang u Deputy Commissioner ka South West Khasi Hills u la bthah ban shim ia ka jingpynshitom ba tyngeh, kynthup ban mudui da ka ejahar pyrshah ia une u nongsam rashon halor ka jingkyntait ban sam ia ki mar rashon sha kiba dei hok ban ioh.

“Ka CM Connect ka la pynkupbor ia ki briew jong ngi. Mynta ki paidbah ki la shlur ban ieng ialeh na ka bynta la ka jong ka hok. Nga dap da ka jingsngewhun ba ki briew jong ngi mynta ki la lah ban ioh ia ka jingpynbeit halor ki jingeh kiba ki iakynduh, bad ka lad ban ujor ia ki jingeh jong ki lyngba ka CM Connect,” ong u Conrad Sagma.

U la ong ruh ba kum u riew sain hima u la ioh pdiang ia kiba bun ki jingujor bapher bapher bad ki dorkhas na ki paidbah kiba u la iakynduh, hynrei kam long kaba suk ia u ne ia ki paidbah ba kin lah lut ban pynpaw ia ki jingsngewkhia. U la ong ba ka CM Connect ka dei ka long kum ka rynsan ha kaba ki paidbah ki lah ban pynsngew ia ki jingeh bad ban shimkhia ban weng ia ki.

“Watla kam long kaba suk ban lah ban weng ia baroh ki jingeh, hynrei ka dei ka jingsdang ka jong ngi ban plie ia ki lad ki lynti ia ki paidbah ba kin ioh ban pynsngew da la ka jong ka sur jong ki,” u la ong da kaba bynrap ba ha kine ki shi snem kiba la dep, ka sorkar ka la lah ban pynbeit ia kiba bun ki jingeh bad ki jingsngewkhia.

Ki sienjam lyngba ka CM Connect ki thmu ban pyniaid shakhmat ia ki jingkular jong ka sorkar jylla ban pynthikna halor ka jingioh ia ki mar bam bad ka jingbishar kaba hok ia baroh ki nongshong shnong khamtam ha ki thain kiba pajih bad kiba kyndong kiba shem shitom ban poi.

Haba kdew halor ka jingkylla jong ki jingjia, u Commissioner & Secretary ka tnad Food and Civil Supplies u Pravin Bakshi u la ong, “Ka Tnad Food & Civil Supplies ka pyrshang ia kaba bha tam ban pynthikna halor ka jingsam ryntih ia ki mar rashon khnang ba kin ym don ka jingshah iehnoh jong kiba dei hok ban ioh. Ka jingsam ia ki mar rashon lyngba ka ePOS ka long kaba kongsan ban pynthikna ba kiba dei hok ban ioh kin ioh pdiang ia automated receipt na ka bynta ka bhah jong ki, bad la pynlong ruh ia ka jingjurip bniah kaba man la ka por.”

Na ka liang ki nongshong shnong kila ai ka jingiaroh ia ka jingshimkhia mardor jong u Mymtri Rangbah ia ka jingeh ka jong ki.