Ba wan tep metiap khlem akor hapoh shnong, ujor ki nongialam ka shnong Umshangling sha u DC

Syllad | The Rising MeghalayaJanuary 14, 2025

Ki nongialam shnong jong ka shnong Umshangling kaba don marjan bad ka sor Nongpoh,  ha ryngkat ki paidbah nongshong shnong ha ka 13 tarik Kyllalyngkot da ka jingsngewkhia ki la leit ban ujor sha u Deputy Commissioner ka Ri Bhoi District halor ka jingwan tep khlem akor ia kawei ka metiap bym don nongkam ha ka jaka tep ia ki briew bym don nongkam shuh jong ka shnong.

Kine ki nongialam shnong ba la lamkhmat da u Rangbah Shnong Bah James Maiong bad u Secretary Shnong Bah Vincent Sohkhwai ki la iathuh ba kane ka jingjia ka la jia ha ka 12 tarik Kyllalyngkot, ha kaba la don ka jingleit tep ia kawei ka metiap bym don nongkam shuh ha kaba la shu tep tang dep khlem da tap bha ia ka thliew tad haduh ba ki ksew ki la jynrat ia katei ka thliew ban khlong ia katei ka metiap bad pynsaphriang hapoh ka shnong ka thaw kaba la buh jingma ruh ia ka koit ka Khiah ki nongshong shnong khamtam ka jingijli kaba la mih na katei ka jingjia.

U Bah Vincent Sohkhwai bad ka Kong Anjelina Tado ki la iathuh ba kane ka jingleh khlemakor ka la long kum ka jingibein ia ki nongshong shnong ka Umshangling watla kum ki bor shnong ki la dep ban ai sngewbha ia ka jaka ban tep ia kito ki metiap ki bym don nongwankam shuh, hynrei na ka daw ka jingtep khlemakor bad tang dep ka la wanrah ia ka jingijli kaba shyrkhei hapoh ka shnong ka thaw.

Nalor kata ki la pynpaw ruh ba ha kane ka shithi ujor ki la pynpaw ruh ba kum ka shnong hi kan ym pdiang ia kum kane ka jingleh khlemakor ban shu tep tang dep ia ki metiap kaba lah ban buh jingma ym tang ia ka koit ka khiah hynrei ka la long ruh kum ka jingibein ia ka shnong ka thaw bad lada dang jia kumne na ka liang ka shnong kam banse ban khang noh ia ka jingwan tep ia ki metiap bad la dawa ruh ban phah buh noh da ki briew ban peit pyrman bad ban pyntip sha ka shnong haba don ka jingwan tep ia ki metiap ha katei ka jaka.

Na ka liang u Deputy Commissioner ka Ri Bhoi District u Abhilash Baranwal, haba pynpaw ia ka jingsngewkhia halor kane ka jingjia u la kular ban lum kyrkieh ia ka jingialang hapdeng ki pulit ka district, ki bor ka Nongpoh Town Committee bad ki bor pyniaid district ban iakren halor kane ka jingjia bad ban pyntikna ba kan ym jia shuh nangne shakhmat.