Balei ba dei ban pynkylla haka rukom leh?

Syllad | The Rising MeghalayaJune 26, 2021

Baroh ngi thngan, ngi kwah ka bam ka dih kaba biang, ngi kwah ban ioh kamai kajih ba biang ban pyndap iaka jingdonkam kaba man la ka sngi ha ki ïing ki sem jong ngi, hynrei kaba kongsan hi ha u briew lada u/ka ki klet pat iaka koit ka khiah kaba mut ngi la phiel bad kaba ngi don ruh ngin duh lut haka jingim.

Kum u nongthoh haba phai sha ki jingbthah ka tnad ka koit ka khiah ban iakhun pyrshah iaka jingpang khlam COVID-19 ne u Coronavirus bad ka jinglong jingman jong ngi ki briew ka long da pongpet namar ba ngim lah ban bud ïaki adong adit COVID-19 khamtam haka jingkylla haka rukom leh ne ka COVID-19 appropriate behaviour.

Na ka por sha ka por ka bor synshar district kala pynmih iaki kyndon pynjari ban tem iaka jingpur ka jingpang khlam COVID-19 bad ki shnong bapher bapher ki shimkhia ban iarap iaka bor synshar district ha ka ban pyntreikam ïaki kyndon pynjari.

Hynrei la lap ba bunsien hi kane ka jingpyrshang jong ka bor synshar district bad ki shnong kala lehnohei haba u paidbah salonsar kynthup iaki dukan, ki nongdie madan kim bud pat iaki adong adit COVID-19, kaba la theh umpjah iaka jingtrei shitom ki shnong bapher bapher khamtam ki nongkitkam shnong kiba ym ioh nong eiei ne kiba trei iaka kam tang kum ki nongtrei mon sngewbha.

Ngam mut ban kynnoh iano iano, hynrei ka jingmut jong nga ka long kumno kein ngin kylla haka rukom leh haba ngi duna ne sahdien pat ha kiliang ki jingtei (Infrastructure) ne kita iew ki hat kiba paka ban ioh shong ki nongdie haki jaka ba paka ba kylluid bad ba suk ia u paidbah ban iaid ban ieng bad ban thied ban pet.

Ka nuksa ka sor Jowai khamtam ka Iawmusiang, kaba dei ka ïitkhmih jong ka district West Jaintia Hills, ha kaba wat hadien bala pynjynsur iaka rukom plie bad khang iaki dukan ba donkam u paidbah bad ailad iaki nongdie madan ban die ha iew ha hat, phewse la lap ba kita ki adong adit kim treikam bad ki paidbah u leh bymsalia ia kine ki kyndon ban iakhun pyrshah ia ka jingpang khlam COVID-19.

Kaba isangsot shuh shuh namar ba ngim don ia kita ki jaka shong iew kiba paka, la lap ba ki nongdie kila poi sha jaka iaid lynti u paidbah (footpath) kaba la pynkhap ngiah bad pynthud pat iaka iaid ka ieng u ba bun ba lang. Kane kam dei tang ha kane ka por ba wan lynsher ka khlam, hynrei kala long ka rukom ha Jowai.

Ki nongdie madan ruh ki dei ki briew, ki don ka hok, ka jingkylli kalong mano pat ban ai ia kane ka hok jong ki ban ioh shongdie ha ki jaka ba biang?

Don pat ki dukan kiba shongwai ha ki iing jong ki riew shimet kiba la ai da u number ba kin plie ha ka sngi kaba la buh kyrpang, pynban ki dang leh pyrshah iaka rukom pyniaid shnong ka Dorbar Tympang Iawmusiang bad plie iaki dukan.

Hato ngin kynnoh iaka Dorbar Shnong Tympang kaba pyrshang ban pyntreikam iaki kyndon pynjari ha kaba iadei bad ka khlam COVID.

Hato ka shnong Tympang pat kam don ka hok mo ban wanrah iaka khuid ka suba ka shnong bad ban iada iaka shnong na ka jingpur une u jingpang khlam? Shuh shuh ka jingkylli ka long hato kine ki jingangnud jong ka kim long kiba shong nongrim?

Lada ngim lah ban bud iaki kyndon kiba la pynjari, ka bor synshar disrict ruh kaba suk eh ia ka ba kan sympat ia u paidbah salonsar bad kane kalong ban khang shnong ne lockdown bad kane kan ktah iano? Ka jubab ka long ia u duk u suk, u kup shilliang sem shilliang shuwa, kumta ka bha eh ia ngi ban kylla haka rukom leh ne ka Covid-19 appropriate behaviour ban ngin lait na ka jingkynnoh uwei ia u wei ne kdew kti uwei ia u wei.

Ka jingdawa kaba hakhmat ka long ba ki Nongmihkhmat paidbah bad ka Sorkar kaba ngi jied ruh ka dei ban wanrah pat iaki jingkylla khnang ban pynjem ia kane ka jingeh u paidbah.

Ka jingshna iew ha Iawmusiang Jowai kala long tang ka ishu elekshon bad sa shisien kane ka iew kan kylla long hi ka ishu elekshon.

U MLA Jowai u dei ban sngewthuh ba kane ka mat ka dei ka jong u bad u dei ban wad iaki lad ban tei pyndep ia kane ka iew ban pynkynriah ia baroh ki nongdie madan ban pynjem ia kine ki jingeh u nongdie madan uba wan na kylleng ki shnong ban die iaki mar kiba pynmih hala shnong.

Ka sorkar pdeng kala pynbna ba ka khlam COVID-19 ka dei ka National Disaster ne kata ka apot jong ki jingjia ba sngewsih. Katkum ki kyndon aiñ ka bor ka shong ha u/ka District Majistor ban pyntreikam iaka hukum jong ka khlam haki district ban pynjari bad ban pynshitom ia kino kino kino kiba pynkhein iaki kyndon jong ka khlam.

Shuh shuh iaka lockdown hi la pynjari haba jur ka jingpur ka khlam bad ka West Jaintia Hills ka don haka kyrdan jong ka jingma na ka jingjur ka jingiabit khlam bad lada ngim bud ryntih iaki kyndon kane ka ktah iaka ioh ka kot, kamai kajih, ka pule puthi, ki jinglehniam bad kiwei kiwei ki jingdon kam kiba man la ka sngi.

Khnang ba ngin lait na ka jingkhang shnong, ka long kaba donkam haduh katta katta ban don ka jingkylla ha ka rukom leh (Appropriate behaviour change) da kaba bud ryntih iaki adong adit COVID-19. Bud ruh ia kiwei kiwei ki jingbthah haka rukom leh ban deng iaki mask, ka jingdonkam ban test bad ka ban kiar ha ka jaka ba bun ne lum paidbah ban iada ialade na ka jingbit iaka jingpang khlam.