Balei ba u ma Damewanhi Rymbai u dei ban ïoh ïa ka nam kum u nonglam lynti?

Dr. HH MohrmenApril 21, 2022

Haba u ma Damewanhi Rymbai u shah ïa ka Jowai Municipal Board ba kan wan theh shiphang ïa ka ñut kaba la lang ha Jowai, ha ka par dewïong ba la thylli jong u, u la leh ïa kaei kaba ka sorkar kala dei ban leh naduh mynshuwa. Kata ban hukum ba ki trai par dewïong baroh ki dei ban khang bad tep ïa ka par dewïong jong ki hadien ba kila tih lut ïa u mar napoh khyndew.

Hynrei ngi shem mynta ba baroh ki trai par dewïong kila shu ieih shrah ïa ki par dewïong bala thylli jong ki kaba buh ruh ïa ki briew bad ki mrad ha ka jingma.

U Pioneer

U dei u nonglam lynti (pioneer) namar ba u kwah ban khang noh ïa kane ka par bala dep pyndonkam jong u da kaba pyndap biang ïa ka bad ban thung dieng thung siej biang ha kata ka jaka ynda kala dap. Ngi dei ban kynmaw ruh ba u ma Damewanhi u don bynta ha kaba pynwan dur ïa ka shnong Moolamylliang kum kata ka model village kaba la khring ïa ki nongwan kai haka por Krismas bad newyear. Ka Moolamylliang ka pawnam ruh na ka bynta ka jingkhuid bad ka jingbun jong ki dieng ki sieij ha kane ka shnong.

Dei kane kaba la pynlong ïa kane ka shnong ba kan ïoh ïa ka nam kum ka model village. Kane ka jingtep pat ïa ka par dewïong ruh ka dei kawei pat ka model kaba kane ka shnong kala pyni ka nuksa kaba bha ïa kiwei pat ki shnong ha ki thañ ba ki briew ki tih dewïong.

Namar kata u ma Damewanhi Rymbai ula leh ïa kaei kaba ka sorkar kala dei ban leh naduh mynshuwa ban hukum ïa ki trai par dewïong ba ki dei ban khang noh ïa ka krem hadien ba ki la sei lut ïa u dewïong napoh khyndew.

Hato kane ka don ka jingktah ïa ka mariang?

Ym kumba shu theh ïa ka ñut ha madan, kane kan duna bha ka jingsma bad kan ym don ka jingijli ne isih ïa ki khmat namar ba ka jaboh kan don hapoh ka krem dewïong. Wat haka por kaba kit ruh, la ïakut ba ka JMB kan tap bha ïa ki trok khnang ba kan ym ktah ïa jaka na kaba ki trok ki ïaid.

Kiei ki jingmyntoi ïa ki trai jaka bad ka thañ hi baroh kawei?

Haba ngi ieih shrah ïa ki krem dewïong ba la dep khlong, kane ymtang ba ka dei ka jingma ïa ki briew ne ki mrad ïoh ba kin leit hap ha ki thliew cutting ki baheh, hynrei kan ïarap ruh ban pynduh pyndam ïa ka jingsniew jong ka um ha sla khyndew (surface water). Haba ngi shu ieih ïa ki krem dewïong khlem tap ïa ki, kaba nyngkong eh kaban jia haka por liyur, ka long ba ka um bala kylla umphniang Acid Mine Drainage kaba mih na kine ki krem kan tuid ban pynsniew ïa ki um ha ki wah duid bad ki wah. Hynrei lada ngi lah ban tap ïa kine ki krem, ka um kan ym mih shuh ban tuid sha madan ban pynsniew ïa ka um ha sla khyndew.

Kan ïada ïa ka jingsniew jong ka um hapoh khyndew

Haka por liyur haba ngi ieih ïa ki par dewïong khlem tap, ka um slap ka dap hapoh kine ki krem bad ka siep ne ka ngam shapoh khyndew ban pynsniew ïa ka um kaba don hapoh khyndew (undergraound water). Da kaba tap ïa ka krem par dewïong, ka um slap kan ym ïoh lad shuh ban ngam shapoh khyndew bad kane kan ïada ïa ka um kaba don hapoh khyndew.

Ka jingpynim biang ïa ka khyndew

Kaba khatduh ba kaba kongsan ka long ba ynda ka krem kala dap ïa ka bynta ba hajrong jong ka yn tap da ka dew sboh kaba ki briew kin lah ban pyndonkam ne ban thung dieng thung sieij ha kata ka jaka. Kane ka dei ka jingïohi jngai jong u ma Dame kaba ngi dei ban ïaroh. Ka jingïaroh ka leit ruh sha ka dorbar shnong bad u waheh chnong ka shnong Moolamylliang kiba ïohi jngai ïa kaei kaba dei ban leh khnang ban tap noh ïa ki thliew dewïong bad ban ïoh pyndonkam biang ïa kata ka jaka sa shisien pat.

Namar kata ngi dei ban ai ka jingïaroh ïa u ma Damewanhi namar ymtang ba ula ïarap ban weng ïa ka jhep na ka shnong Jowai shipor, hynrei kaba kongsan ka long ba ula lam lynti ha kaba kumno ngin leh ïa ki par dewïong kiba la thylli kiba ki trai par dewïong kila shu ieih shrah kumto khlem leh eiei bad buh ïa kiba bun ha ka jingma.