Balei ki VPP ki pyndonkam iaka Surok bala shna da ka Sorkar NPP: Wailadmiki

Syllad | The Rising MeghalayaFebruary 16, 2025

U MLA jong ka Jowai Constituency Ma Wailadmiki Shylla u la ong ba lada ka Sorkar NPP ka khlem leh eiei te kumno ki nongialam jong ka Voice of the People Party (VPP) ki ioh pyndonkam ia ka surok bala shna da ka Sorkar.

U Ma Wailadmiki u la kynthoh ia ka VPP ha ka jingialang ialap elekshon na bynta u kyrtong jong ka NPP na ka Jowai North Constituency u Dr. D.I. Kjam ha ka madan Ladthadlaboh, Jowai ha ka miet ka 15 tarik Rymphang.

U MLA jong ka Jowai Constituency u la bteng shuh shuh da kaba ong ia ki nongialam jong ka Voice of People Party ba kin leit ujor da ka FIR ia ki Minister, ki MLA bad ki MDC jong ka NPP lada ki dei ki nongtuh ym ban kin shu hala shu pyrta ha lynti syngkien.

U Ma Wailadmiki u la ong, u President jong ka Meghalaya Pradesh Congress Committee u Ma Vincent H. Pala u la kynnoh ia u Deputy Chief Minister jong ka Meghalaya u Ma Sniawbhalang Dhar ba u donkti ha u drok bad u Ma Sniawbhalang u la dawa ia u Ma Pala ban un leit ujor da ka FIR pyrshah ia u bad lada um lah ban pynshisha un ngat ha defamation bad u Ma Sniawbhalang ula dawa ka bai mynrain khmat kaba 100 klur. Ula kam ba khatduh khatwai u Ma Pala un hap ban pan map.

U Ma Wailadmiki u la iathuh shaphang ki kam ki jam kiba u la leh naduh ba u la shimti kum u MLA kaba kynthup ia ka jingshna maramot ia ka Surok Jowai kaba 33 kilometre lyngba ka pisa na ka World Bank, ka jingpyntreikam ia ka MCH Hospital ha Panaliar, ka jingwan jong ka Meghalaya Games ka la wan shibun bah ka jingmyntoi ha ka dor Jowai namar la ioh ban pyniphuh iphieng ia ka MDC Hostel, ki madan ialehkai bad kiwei kiwei.

U la iathuh ruh ba shen yn sa pyntreikam noh ia ka Nursing College ha Rilum Jaintia bad yn sa shna noh ia ka surok bye pass na Lad College sha Jingkieng Myntdu bad yn sa sdang noh shen ia ka jingshna ia ka jaka bret niuh ne ka landfill.

Haba iathuh shaphang ki kam ki jam jong ka Sorkar NPP, u MLA Jowai Constituency u la ong ka jylla Meghalaya hadien 50 snem jong ka jingioh jylla kan sa ioh ia ka State University nalor kiwei kiwei.

U Ma Wailadmiki ula ong ba hadien bala pynmih ia ka State Anthem ki MLA jong ka NPP na Ri Lum Jaintia ki la leit sha u Chief Minister ban dawa ban pynkylla ia ka State Anthem namar bym don ka ktien Pnar bad kumta la pynsangeh noh shipor ia ka jingtem ia katei ka State Anthem bad mynta la kynthup lang ia ka ktien Pnar ha ka State Anthem.