Bam duh ka ding ia iingskul jong ka KJP Girls’ Higher Sec School kaba 131 snem, T.1 klur kular u Conrad ban theh jingiarap

Syllad | The Rising MeghalayaMay 21, 2023

Ka long ka jingjia kaba sngewsih bad kaba sngewpangnud hadien ba ka iing skul ha nongbah Shillong kaba la 131 snem ka la kylla dpei hadien ba ki thylliej ding ki bam duh iaka ha ka Sngi U Blei.

Ha ka por kumba 2.30 mynstep eiei jong ka Sngi U Blei ka ding kaba rhem bha ka la bam duh ia ka iing skul KJP Girls Higher Secondary School bad hostel kaba don ha Mawkhar, Shillong.

La seng ia katei ka skul da ki missionari na Welsh ha u snem 1892 da ka jingthmu ban ai jingnang jingstad kaba kyrpang tang ia ki khynnah kynthei.

Katkum ki jingtip bala ioh lum haduh mynta ym pat tip satia ia ka daw jong ka katei ka ding kaba pynjulor pura ia ka iingskul pawnam bala tei naduh ki por jingsynshar ki phareng. Hynrei bun ki paidbah ki la kren thikna ba kam dei na ka daw ka jingthud ka bording namar ka dei ha ka por load shedding.

Ha ka step Sngi U Blei ki nonghikai skul bad ki khynnah skul ba mynta bad mynshwa bad ki riew paidbah ki la wanpoi sha katei ka skul bad ka la long ka jingiam briew kaba jur halor ka jingduh noh ia ka iingskul. U Myntri Rangbah ka jylla u Conrad K Sangma ula poi mar mar sha katei ka skul bad u la kular ban noh jingiarap na ka sorkar ban tei thymmai biang ia ka iing skul haduh T.1 klur lyngba Chief Minister’s Special Development Fund.

Ka long kaei kaei kaba sngewkhia jingmut ba tang hapoh arsnem artylli ki jingjia pluh ding ki la jia ia ki jingdon jingem jong ki Balang Khristan ha ki thain Mawkhar Qualapatty. Kaba nyngkong ka long ka jingpluh ding ha iingmane Balang U Blei Meghalaya & Assam ha Qualapatty kaba long marjan bha bad ka Mawkhar. Kaba ar ka long kane ka jingpluh ding jong ka iingskul jong ka Balang Presbyterian.