Bam shngiam ka ding ïa kawei ka iing ha Mooshrot

Syllad | The Rising MeghalayaMay 15, 2021

Kawei ka ïing ka la shah bam shngiam haka ding kaba rhem mynta ka sngi Saitjaiñ haka Shnong Mooshrot, West Jaintia Hills District.

Kane ka jingpluh ding ka jia haka por 12 baje mynsngi. La suba ba katei ka jingpluh ding ka jia naka jingthut jong ka bor ding.

Ïa kane ka ïing ladei trai da ka Kong Thikna Hadem bad u Bah Medri Lamare kiba don sha jaka rep haka por ba jia kane ka jingjia.

Ha kane ka jingjia ym don kano kano ka jingjia sngewsih lait noh ka jingduh noh ia baroh ki jingdon jingem kynthup naduh u khaw, u kba bad kiwei kiwei ki tiar ki tar ba kordor. La antad ba ka jinglut ka la kot shaka 6 lak tyngka.

Haba ïadei bad kane ka jingjia ka KSU Jaintia Hills District lyngba u Education Secretary u Justice Paul Lyngdoh uba dei ruh u trai shnong ula pynrem halor ka jingtlot jong ka sorkar namar haba don kum kine ki jingjia pluh ding haka thaiñ 4- Mowkaïaw Constituency ka sorkar kam lah ban ai jingïarap ïaki lanot pluh ding namar ba jngai ki kali pynlip ding bad katba ban ap ïaki kali pynlip kiba na Saphai Outpost ne Jowai ka ding ka la ïoh ban bam duh lut iaki jingdon jingem.

U Justice Paul Lyngdoh ula kyrpad ïa u MLA u Nujor Sungoh kumjuh ia u myntri ki kam pohïing ban buh kawei ka kali pynlip ding ne ka fire brigade ha man la ki outpost khnang ban suk ban ïabeh ha kano kano ka por ba lada don kum kine ki jingjia.