Bamduh ka ding kaba klang ia ka iing ha Sohnidan Ri Bhoi, julor baroh ki jingdon jingem

Syllad | The Rising MeghalayaApril 14, 2024

Kawei ka jingjia ba sngewsih ka la wan ban lynshop ha kawei ka longïing kaba la hap ban duh lut ia baroh ki jingdon jingem  na ka daw ka jingshah bamduh ha ka ding kaba shyrkhei kaba la jia ha ka janmiet jong ka sngi Saitjain ba la lah.

Kane ka jingjia ba ba sngewsih ka la jia ha ka Shnong Sohnidan ba hap ha ka Umsning C&RD Block, Ri Bhoi District, kata ha ka longiing jong ka Kong Itailis Khymdeit bad u Bah Tiwen Warjri kiba don 5 ngut ki khun.

La iathuh ba ha ka por ba kane ka jingjia ka la wan jia baroh ki dkhot jong kane ka longiing kim shym la don ha la iing namar ki dang leitkai sha ka ïingkmie.

Katkum ki khubor la ong ba kane ka jingpluh ding ka dei kaba sdang na jaka shet jingshet jong kane ka longiing, kata hadien ba katei ka longkmie ka la dep shet dep tiew bad iehnoh ïa ka ïing ban leit kai sha ka ïingkmie bad dei tad haduh ba ki la wan phai ki la lap ba ka ding ka la bamduh ïa ka ïing ka jong ki.

La ïathuh ruh ha kane ka jingjia, ka ding ka la bamduh haduh 5 quintal u synsar, 5 mon u khaw. 6 song ki tin tata bad kytnhup ruh ki khiew ki siang, ki jaiñ ki nep, ki kot pule ki khun jongki bad kynthup ruh baroh ki kot donkam ba kim iohlad shuh ban sei.

Halor kane ka jingjia na ka liang ka Shnong Sohnidan ka la pynpaw ka jingsngewsih kaba khraw halor kane ka jingjia bad kum ka shnong ruh ka la pyrshang ban thaw lad thaw lynti ban ïarap katkum ki jingkotbor ka jong ki.

U Bah Wander Khymdeit, Rangbah Shnong ka Sohnidan, u la ong ba ki la pyntip mardor ha kaba iadei bad kane ka jingjia   sha ki bor ophis jong ka Umsning C&RD Block bad ruh sha ki bor pulit ban thaw ïa ki lad jingïarap na ka bynta kane ka longiing.

Shuh shuh, na ka liang u Bah Wander Khymdeit  u la buh ruh ka jingkyrpad sha ki bor sorkar bad ki nongmihkhmat ba kin thaw lem ïa ki lad jingïarap  namar kumba ka long mynta kane ka longiing ka la kylla khlem ïing khlem sem bad ki donkam kyrkieh ïa ki lad jingïarap na ka bor sorkar.