Bamduh ka ding kaba klang ia ka karkhana atta ha Garikhana

Syllad | The Rising MeghalayaDecember 2, 2023

Ka ding kaba klang hynnin ka por palat shiteng synia kala bam duh ia ka karkhana kaba dei ruh ka kudam buh atta jong ka kompeni magic cook kaba don ha ka thain Garikhana, Shillong hynne ka step phyrngap, hynrei ka long kaba donbok ba kam shym la don kano kano ka jingjia ba sngewsih sha ka liang ki mynsiem briew.

Ha kaba iadei abd kane ka jingjia na ka liang ki bor District kynthup ki Pulit, ki Pulit na ka Tnat Fire & Emergency Services, SDRF, shipai, DMHO bad GTC kila iapoi sha kane ka jaka ban pynthikna ba ka ding kan ym pur sha kiwei pat ki iing ki sem kiba don marjan bad ban lah pynlip noh kloi ia ka ding kaba klang.

Ka la shim por haduh kumba 10 kynta ia kine ka tnat pynlip ding bad kiwei pat ki kynhun kiba ia don bynta ba kin lah ban pynlip duh ia kane ka ding kaba klang bad kaba la wanrah ia ka jingjulor kaba jur.

Katkum ki khubor la iathuh ba kane ka jingjia ka la jia ha ka por kumba 1 baje mynstep, bad ka la don ruh ka jingsuba kaba jur ba ka daw jong kane ka jingjia ka lah ban dei na ka jingthut ha ka lain bording ilektrik.