Ban bud ia ki dienjat ki longshuwa shimkhia ka KSU Nongtyngur ban pynbha ia ki jingkieng diengjri

Syllad | The Rising MeghalayaOctober 23, 2022

Ka Khasi Students’ Union (KSU) Nongtyngur Unit haka sngi Saitjain ha ryngkat ka jingïaraplang ki nongialam Shnong kala pynbha bad maramot ban shna pynwan dur ia ka jingkieng diengjri kaba don ha syndah jong ka shnong Nongtyngur.

Ka Nongtyngur ka dei ka shnong kaba hap hapoh Pynursla Sub Division, East Khasi Hills District.

Ka jingthmu ka KSU ban pynbha ia kane ka dieng jri, kalong na ka bynta ban wanrah ïa ki jingmyntoi bad jing itynnad bad ban pynneh kyrpang ruh ïaki matti ba la prat lynti da ki longshuwa manshuwa naduh mynhyndai.

U samla Melajied Khongbuh General Secretary KSU Nongtyngur Unit, ula ong ba ka KSU kala shimti ban pynbha bad pynjanai ïa katei ka jingkieng jri kadei kum shi bynta ban ïada na ka jingshah pynjot pynjulor bad pynsniew dur ha ki briew ïa katei ka jingkieng diengjri bad na bynta ban wanrah ruh ia ki jingiadei paralok kaba jan bad ka mei-ramew.

Ula pynpaw ruh ka jingsngewkmen ba naduh ba ka KSU kala shim jingkitkhlieh ban pynbha bad sumar ia kine ki dieng jri, ki nongshnong ruh ki la sdang ban sngewthuh bad kam don shuh ka jingbret jaboh ne pynjot bad pynsniewdur ia katei ka jingkieng diengjri.

Kum kine ki jingkieng jri kiba kham pawnam hapoh ka Bri u Hynñiewtrep ki long ka jingkieng diengjri ha Nongriat, Mawlynnong-Nohwet, Kudengrim, Mawkyrnot bad kiwei de kiba ym lah shuh ban jer kyrteng.

Ka KSU kala ong ba kine ki dei ki dak ki shin kiba pynpaw shai kdar ba u Khasi hyndai u dei u jaitbynriew u ba iohi jngai bad pyrkhat maian bha ia ka imlang sahlang, ka mei mariang bad khamtam ia ka lawei ki longdien ki ban sa wan. Kumta ka KSU ruh bad bud iaka nuksa uba rim, kala sngewdei ban pynbha ia kane ka jingkieng ban ai kylliang iaka pateng kaban wan.

Na kaliang ka KSU Nongtyngur Unit ka sngewdei ban ai khublei shikatdei ei ia ka jingiatreilang ki nongshong shnong bad ka kyrmen ruh ba ki jingthmu jong ka kin long kiba jop haba ka don ka jingiatreilang bad ki para shnong para thaw bad ki paradoh parasnam ka ri ka jaitbynriew.