Ban iada ia ki tyllong um, pynmih jingmaham u DC ka East Jaintia Hills

Syllad | The Rising MeghalayaAugust 17, 2023

U Deputy Commissioner, East Jaintia Hills District, Khliehriat ha ka 14 tarik mynta u bnai u pyntip sha ki paidbah nongshong shnong ba na ka liang u Lat ka jylla Meghalaya u la pynmih ia ki jingbthah ha kaba iadei bad ki lad ki lynti ban pynneh pynsah bad aijingiada ia ki tyllong um ha ka jylla.

Ia kine ki jingbthah la pynmih shibynta ban iada bad pynneh pynsah ia ki tyllong um khnang ba kan ym ktah ha kaba iadei bad ka jingioh ia ka umbam umdih ha kane ka pateng kaba mynta bad ka ban wan ha ka jylla.

Katkum kine ki jingbthah la khang pyrshah ban bret jakhlia ha ki jaka kiba don hajan ki tyllong um. La khang pyrshah ruh ban pyntuid ia ki um jaboh kiba mih na ki karkhana lane na kino kino ki jaka kiba pynmih ia ki jaboh jabaoin sha ki tyllong um.

Nalor kata la khang pyrshah bad mano ruh ba ym dei ban don ki ban pynthut ia ki jingtreikam jong ki bor sorkar ba la pynkhasmti lane ki tnat treikam kiba khmih na ka bynta ban iada bad pynneh pynsah ia ki tyllong um.

Lyngba kane ka hukum la khang pyrshah ruh khlem ka jingai jingbit jong ki bor sorkar ba dei khmih ban leh ia kino kino ki jingtih jingksam hajan ki jaka ba don ki tyllong um.La khang pyrshah ruh ban ym shim kabu ia ki tyllong um na ka bynta ban kamai spah lyngba ka jingpynlong ia ki jingkhwai dohkha kiba lah ban pynthut ia ki tyllong um.

Shuh shuh la maham ruh ban leh ia kino kino ki kam kynthup ka jingtep ia ki tyllong um kiba lah ban pynjulor ne pynduna ia ka jingdon jong ka um, bad la maham ruh ia kino kino kiba shna ia ki kynja jingtei hajan ki tyllong um.