Ban iada iaki dohkha ha Wah Myntdu, pynbna ka Ialong da ka Fish Sanctuary

Syllad | The Rising MeghalayaApril 21, 2021

Kum shibynta ban iada iaki dohkha bad kiwei kiwei ki dohum dohpnat, ka Dorbar Shnong Ialong, West Jaintia Hills kala pynbna paidbah ba ïaka thwei Um Dalong, ka bynta jong ka Wah Myntdu kum ka Fish Sanctuary haka sngi Balang.

Kane ka bynta jong ka Wah Myntdu kaba la pynbna kum ka Fish Sanctuary ka long hapoh shi spah metre (100M) naka Check Dam kaba don ha Deiñrngam bad sha ka bynta ba shaneng ka wah sha ka liang sep sngi shuwa ban poi ka thwei Kai Ksoo.

U Ma T Ram Phawa, Waheh Shnong Ialong, ula ong ka dorbar shnong kala khang pyrshah ia baroh ban khwai lane tong iaki doh um doh pnat ha kane ka jaka kaba la pynneh pynsah iaka dohkha naduh 1 tarik u Jymmang (May) 2021. Ula ong ba kino kino kiba leh pyrshah kin ngat haka jingshah pynshitom katkum ki aiñ shnong.

Ula ong ba ka dorbar shnong ka wer ia baroh ki paidbah ban iatreilang bad ka shnong khnang ba ka jingthmu ban kyntiew iaka shnong kum kawei ka Tourist Spot kan long kaba jop.