Ban jur u CM ia ka jingiatreilang ki Jylla NE ban kyntiew ia ki kam jngohkai ha ka thain

Syllad | The Rising MeghalayaApril 8, 2025

U Myntri Rangbah ka Jylla u Conrad K Sangma ha ka 7 tarik Iaiong u la ban jur halor ka jingdonkam ia ka jingiatreilang hapdeng ki Jylla ka thain Shatei Lammihngi (NE) khnang ban lah ban kyntiew ia ki kam jngohkai hapoh ka thain.

Ia kane u CM u la pynpaw haba pyniaid ia ka jingialang High Level Task Force kaba nyngkong halor ki kam jngohkai kaba la long ha katei ka sngi ha kaba la wan ban iashim bynta da u Myntri ka DoNER u Jyotiraditya M Scindia, u CM ka Sikkim u Prem Singh Tamang, u CM ka Tripura u Dr. Manik Saha lem bad ki heh ophisar na ka sorkar pdeng bad sorkar jylla.

Na ka liang u Conrad Sangma u la pynpaw ba ki nongwan shangkai na kylleng ka ri India bad na shabar ka ri ki ithuh ia ka thain Shatei Lammihngi kum kawei kumta ka long kaba kongsan ba ki jylla kin iatreilang ryngkat ryngkat na ka bynta ban kyntiew ia ki kam jngohkai.

Ha kane ka jingialang la iatai sani halor ki rukom treikam ban pynpaw pyrthei ia ka jingriewspah ha ki kam jngohkai jong ka thain Shatei Lammihngi.

Na ka liang u Conrad u la iaroh ia u Myntri ka DoNER halor ka jingshim ia ki sienjam ban thaw ia ka Task Force ia kaba u la shim kum ka sienjam kaba kongsan ban kyntiew ia ki kam jngohkai ha kane ka thain Shatei Lammihngi baroh kawei. U la bynrap ba kane ka thain ka la wanrah ia ka Industrial Policy bad ka la pplie ia ki lynti halor ka jingroi ha ki kam karkhana.

Haba kren ha ka jingialang, u Myntri ka DoNER u Scindia u la ong, “Kane ka thain ka lah ban shim kabu halor ka jingriewspah kaba hiar pateng bad ka jingitynnad ba la pynlong da ka mariang ban pyniaid shakhmat ia ka roi ka par kaba neh, ban kyntiew ia ka ioh ka kot bad ban thaw ia ki lad ioh kam ioh jam.”

Kane ka Task Force la thaw da ka Ministry of DoNER ba la khlieh da u Myntri Rangbah ka Jylla u Conrad K Sangma kan bishar bniah ia ki lad ki lynti ki ban kyntiew ia ki kam jngohkai hapoh ka thain, ban aijingmut halor ki sienjam ia kiba donkam ban shim, ban ithuh ia ki jingduna bad ban aijingmut halor ki sienjam ban kyntiew ia ka roi ka par lyngba ki kam jngohkai hapoh ka thain.

Ha kane ka jingialang u Myntri ka DoNER u la aijingmut ruh ba dei ban bishar bniah ia ki rukom treikam kumba long ha Thailand, Cambodia, Vietnam bad kiwei pat ki ri South Asia ha kaba iadei bad ki kam jngohkai pyrthei bad ban thaw ia ka rukom treikam ka ban kyntiew ia ki kam jngohkai hapoh ka thain.

Na ka liang u Myntri Rangbah ka Tripura, u Manik Saha u la aijingmut ban iarap ia kaba la sdang da ka jylla ban kyntiew ia ka kam jngohkai pyrthei kynthup ban pyni ia ki jait jingbam ba kyrpang jong ka thain Shatei Lammihngi, katba na ka liang u CM ka Sikkim u la kren jlan halor ki sienjam ha ki kam jngohkai bad halor ka jingwan tuid ki nongwan shangkai pyrthei sha ka jylla da kaba aijingmut ruh ban kyntiew ia ka thain lyngba ki iew ki hat bad ban iatreilang hapdeng baroh ki jylla ka thain ban pynsuk ia ki nongwan shangkai pyrthei.

Ia kane ka Task Force la thaw hadien ka 72nd plenary of North Eastern Council (NEC) kaba la long ha u bnai Naiwieng 2024 ha Agartala, Tripura. Ia kane ka Task Force la thaw da ka Ministry of DoNER ha ryngkat ka jingiatreilang bad ka Ministry of Tourism.