Ban kynnoh tang iaka PWD ne Sorkar haba aksident kam dei: Prestone

Syllad | The Rising MeghalayaDecember 9, 2022

Ka jingjia hap kali kaba la wanrah iaka jingkhlad u Dr. Sanjoy K Shylla ka long ka jingjia kaba sngewsih bad ka jingduh kaba khraw khamtam ia I lok bad ki khun 3 ngut kiba dangrit kiba ila ieh shadien haka por ba ki dang donkam bha ia u kpa ban sumar sukher bad pynheh pynsan, pynban kaba sngew thamula ka long ba sorkar kam lah ban shim jingkitkhlieh ia kum kine ki jingjia kaba jia na ka daw jong ka surok.

Kane ka jingjia hap kali i Dr Sanjoy K Shylla kala jia haka sngi Balang ha ka surok Chyrmang Iongnoh. Kane ka surok ka dei ka la twa naduh bnai Jylliew jong une u snem haka jingshah pynjulor haka bor mariang kaba la shah rong ruh kawei ka kali.

U Deputy Chief Minister ka Jylla u Prestone Tynsong haba kren bad ki nongthoh khubor haka sngi Palei hadien ka jingialang buh mawnongrim ha Mihmyntdu, ula ong ba ula ioh jingtip ia kane ka jingjia aksident kaba u doktor ula khlad kaba la wanrah iaka jingsngewsih, hynrei ban kynnoh iaka sorkar bad ka PWD kam dei.

Ula ong ruh ba ka aksident ka jia haba sniew ne bha ka surok bad ngi sngewkhia halor kane ka jingjia bad phah iaka khubor sngewlem sha kiba iing hasem I doktor.

Haba kylli ba kane ka surok kam don kino kino ki jingkdew ne ki Road Signage iaka jinglong jingman ka surok, ka jubab u Bah Prestone kalong ba ka PWD ka buh iaki Road Signage ban tip iaka jinglong jingman ka surok bad ka hukum kalong kam dei tang na ka sorkar hynrei wat na ka iingbishar kaba hakhliehduh ka ri Supreme Court.

Pynban kaba lyngngoh ha kane ka surok ka long thik kum ka jaka riam sha ka jingiap, ym don kino kino ki dak ba ka PWD kan buh ia kine ki Road Signage. Kane ka surok ka dei ruh ka surok kaba la pyntrei na ka skim PMGSY.

Ka jingkylli uba bun balang kalong iano yn kynnoh haba kane ka surok ka long kaba ma bad ka long kum ka krem ne ka ruh ban riam ban pyniap (Death Trap). Ka jingkylli ruh ka mih hato ka jingialap ban shngain ka leit ka wan u briew bad ki kali ne kata ka Road Safety ka phiel?

Haba kylli halor ka jingsniew ka surok bah NH 6 ne ka surok Shillong Jowai, U bah Prestone u ong ba ka jingmaramot iaka surok, katta ban pyndap iaki thliew ki syar kala iaid shakhmat kaba la siew da ka sorkar Jylla kumba 5 klur tam, hynrei ban pynjlih ia ka surok bah la pynkhreh iaka DPR kumba 100 klur bad la phah sha ka Ministry of Road and Transport and Highways.