Ban kyntiew ia ka kam ialehkai ai jingmut ka MSOA ia ka Education Commission ban pynrung ia ka sport ha ki jaka pule

Syllad | The Rising MeghalayaDecember 21, 2023

Na ka liang u Working President ka Meghalaya State Olympics Association (MSOA), u Bah John Kharshiing haka 20 tarik Nohprah, ula leit ban aijingmut ia ka Meghalaya Education Commission na ka bynta ban pynrung lang ia ki kam ialehkai sport hapoh ki pule puthi.

Ha kane ka jingialang ba la pynlong ha DERT Annexure Conference Hall ha Shillong, u Bah Kharshiing u la pynshai halor ka jingdonkam ban pyniasoh ia ka pule puthi bad ka kam ialehkai sport khamtam ban pynshlur ia ka jingiashim bynta shitrhem jong ki khynnah naduh ka rta kaba dang lung.

Ha kane ka jingiamir jingmut, u Bah Kharshiing u la wanrah ruh ia ka kaiphot kaba 70 sla kaba tip kum ka “Education and Sports: A Balanced Approach.” Nalor kata u la pynpaw ruh ia ki bynta kiba kongsan jong ka sport ban tei ia ka met ka phad, ka pyrkhat pyrdain bad ka jingiadei para briew. Nalor kata u la ai ruh ka jingpynshai ha kaba iadei bad ka Meghalaya Sports Policy 2019 bad Meghalaya Youth Policy 2021,  kaba thmu ban kyntiew ia ka bha ka miat jong ki nongialehkai.

Hadien kane u Bah Kharshiing u la ai copy ruh ia ka kaiphot bad ia ka Meghalaya Sports Policy 2019 sha ka Chairperson jong ka Commission, Professor S M Sungoh ha ryngkat ka jingdon lang jong kiwei kiwei ki dkhot jong ka Commission.

Nalor kata u  Bah John u la buh ruh ia ka jingtyrwa sha ka Commission kiba kynthup ia ka jingdonkam ban pynbit pynbiang ia ki jaka ialehkai, ka jingiashim bynta jong kiba bun, ka jingthung ia ki coach kibag biang, ki nonghikai ha ka liang ka physical education na ka bynta ki 15,000 tylli ki skul ha ka jylla Meghalaya, kata nalor ka jingdon bynta jong ki riew shemphang ha ka sports, nalor ka jingdonkam sports schools ha man la ki district, ka jingbhah kam ia ki nongwanrah nam ha ki kam ialehkai sports bad halor ka jingdonkam ban pynlong ia ka jingialang bishar kam man la ka lai bnai.

Na ka liang ka Chairperson ka Meghalaya Education Commission kala ai khublei ia ka MSOA halor kane ka jingpynkhreh bad ki jingai jingmut na ka bynta ka Commission ka ban sa khmih bad bishar bniah na ka bynta ban ai ia ka jingmynjur khnang ba ka Commission kan ioh phah ia ki jingbthah sha ka sorkar jylla bad ka ban dei ruh u mawjan ba kongsan ha ka jingpyniasoh ia ka kam ialehkai sports bad ka pule puthi ha ka jylla.