Ban kyntiew ia ka kam jngohkai lyngba ka lehniam ha krem Mawjymbuin; kyntu ka KSP ia ka jingiarap lem u CM

Syllad | The Rising MeghalayaJanuary 4, 2025

Ka Kutumba Surakshya Parishad (KSP) ka la pan ia ka jingiarap lem jong u Myntri Rangbah ka Jylla, u Conrad K Sangma na ka bynta ban kyntiew ia ki kam jngohkai pyrthei lyngba ka jinglehniam (Pilgrim Tourism) hapoh ka krem Mawjymbuin kaba don ha Mawsynram, East Khasi Hills.

Ha ka shithi ba la ai sha u CM ha ka 3 tarik Kyllalyngkot ka KSP ka la ong, “Kumta ngi ngeit ba ka jingdon bynta ka jong ngi halor ka mat kaba iadei bad ka Krem Mawjymbuin ka long kaba la pynshong nongrim katkum ka riti synshar ri bad kumta ngi don hangne .

“Kumta, kane ka dei ka jingkyrpad jur ka jong ngi ia phi ba phin sngewbha ban shim ia ka sienjam kaba donkam khnang ba uwei pa uwei u briew un ioh ia ka hok tynrai jong u katkum ka riti synshar khadar bad ba un pyndep da ka jingkmen ia la ka kamram ha kane ka jaka. Ngi don ka jingngeit ha ka jinglong nongialam ba iohi jngoh ka jong phi bad ngi khmih lynti ban pynbeit ia kane ka mat hangne,” ong ka shithi.

“Ngi kwah ha ka nongrim ba ia ka krem Mawjymbuin kaba don ia u maw Shivling ban plie na ka bynta baroh ki nongmane/nongleit lehniam/nongjngohkai pyrthei. Ngi ngeit skhem ba kane kan nang pynkiew shuh shuh ia ka khajna jong ka jylla ha ka liang ka Pilgrim Tourism. Phi lah ban batai katto katne ki kyndon na ka bynta ban pyndep ia ka jingmane ne jingainguh jingduwai ha khmat u maw Shivling,” bynrap ka KSP.

Ka KSP ka la ong ruh, “Ngi aijingmut ia phi ban buh ki kyndon halor ka jingthang sharak lehniam, dhup bad kiwei pat hapoh ka krem na ka bynta ban tyngkai ia ka jinglong jingman jong ka mariang. Ngi aijingmut ruh ba phin buh ia ki kyndon ban pyrkhing ha kaba iadei bad ka jingbuh ia kino kino ki jait syntiew, ki soh bad kiwei pat ha une u Shivling da kaba pyrkhat ba kan ym don jingktah ia ka mariang. Ngi aijingmut ruh ia phi ban buh da ki nongap ban lum ia ki soh bad kiwei pat ki jingrah shabar jong ka krem khnang ba yn lah ban sam ia ki hapdeng ki briew kiba duk ba kyrduh kiba don ha kane ka thain.”

“Lada phi ha ryngkat ki kynhun jong phi phi kwah ia ka jingiadon bynta lang ka jong ngi, kumta ruh ngin jin da la sngewbha ban iarap ia phi na ka bynta ban pynlong ia kane ka krem kaba kham kongsan shuh shuh hapoh ka ri khlem da ktah ia ki jingngeit jong bad ki jingleh jingkam jong ka jylla bad kiwei pat kiba don jingiadei. Ngi sngew ieid shisha ia ka jingitynnad bad ka jingsarong na ka bynta ka kolshor tynrai ba hiar pateng jong ka Meghalaya. Ngi khmih shakhmat ban ioh ia ka jingkyrshan bad ka jingiatreilang ka jong phi na ka bynta ka bha ka miat bad ki jingmyntoi jong ka ri bad ban pynneh ia ka dor jong ka riti synshar khadar jong ka,” ong shuh shuh ka shithi.

Ka KSP ka la ong ba ka trei na ka bynta ban pynskhem ia ka jinglong trai ri bad ka jingiatylli ha ka imlang sahlang ka jaidbynriew. “Ngi pyndep ia la ki kamram katkum ki kyndon ba la ai ha ngi katkum ka Article 51 (A) jong ka Riti Synshar jong ka Ri India.”

Kumta ruh, ngi la bteng ban don shuh shuh halor kane ka mat kaba iadei bad ka krem Mawjymbuin ha kaba la wan iakynduh ia ngi da ki nongmihkhmat na ka kynhun jong ka Seng Khasi Hima Mawsynram bad ka Meghalaya Indigenous Minorities Tribal Forum (MIMTF) hapoh ka Head office jong ngi ha Chanakyapeeth, Tatimara, Chandrapur, Guwahati (Assam) ban ioh ia ka jingkyrshan ka jong ngi na ka bynta ban pynioh ia ki hok kiba katkum ka riti synshar na ka bynta ban pynlong ia ka jingkane Blei hapoh ka krem Mawjymbuin, ha kaba ngi la iakren ruh lyngba ka phone bad ki dkhot jong ka MIMTF,” ka la ong da kaba bynrap, “Sngewbha ban sngew skhem ba ym don kano kano ka jingleh shimet na ka liang ka Kutumbe Surakshya Parishad ha kaba iadei bad kane ka phang.”

“Kum ki nongshong shnong ba sngew sarong jong ka ri India kane ka dei ka kamram ba kongsan jong ngi ban iada ia ki hok ba kongsan jong ngi ha kano kano ka jaka ha ka ri. Ka Hok ban mane, ka Hok ban im, ka Hok ban pynpaw (Freedom of Expression), ka Hok ban iaid bad kiwei kiwei ki dei ki jong ka riti synshar jong ngi.” Ka hok ba uwei pa uwei u nongshong shnong jong kane ka ri un hap ban ioh ia ka ha man la ki jaka ha ri India. Ym don mano mano ba lah ban khang ia kaei kaei shano shano hangne lait noh tang ia ki kam ki bym iahap. Shuh shuh, uwei pa uwei u nongshong shnong jong kane ka ri u lah ban long na kano kano ka jaitbynriew, ka ne ka niam u don ia ki Kamram ba kongsan jong ka riti synshar ban pyndep na ka bynta ka Jaidbynriew kumba la kdew ha ka Article 51 (A) jong ka Riti Synshar jong ka ri India. U lah ban don u briew u bym lah ban mynjur ia ki kamram ba kongsan, hynrei, lada don kiba thmu ban pyndep ia kita u briew u dei ban shah da kaba sngewnguh,” pynskhem shuh shuh ka KSP.